संगमनेरात अशांतता निर्माण करणाऱ्यांना जनतेने ओळखले आहे: थोरात
भाजपमध्येही अत्यंत निष्ठेने काम केले परंतु त्या ठिकाणी स्वार्थ: शेजुळ
रविवार दि. २४ मार्च, संगमनेर
लोकसभा निवडणुकीच्या पार्श्वभूमीवर अनेक जण भाजपमध्ये जात असताना संगमनेरात मात्र भाजपचे दुष्काळ निवारण समितीचे अध्यक्ष ॲड. रामदास शेजुळ यांनी आपल्या समर्थकांसह रविवारी काँग्रेसमध्ये प्रवेश केला.
काँग्रेस विधिमंडळ पक्ष नेते आमदार बाळासाहेब थोरात यांच्या उपस्थितीमध्ये सहकार महर्षी भाऊसाहेब थोरात सहकारी साखर कारखान्याच्या कार्यस्थळावरील शॅम्प्रोत हा प्रवेश केला आहे. शेजवळ यांच्यासह ओझर परिसरातील त्यांच्या समर्थकांचादेखील यामध्ये समावेश आहे. यावेळी कारखान्याचे चेअरमन बाबा ओहोळ, शंकरराव खेमनर, मीरा शेटे, ॲड. लक्ष्मण खेमनर, संतोष हासे, राजेंद्र चकोर आदींसह विविध पदाधिकारी उपस्थित होते.
यांनी केला प्रवेश…
ॲड.रामदास शेजुळ यांच्यासह भाऊसाहेब शेजुळ, राजेंद्र शेजुळ, दिलीप शेपाळ, बाळासाहेब शिंदे, दादा पाटील शेजुळ, नामदेव थोरात, गंगाधर शेजुळ यांच्यासह त्यांच्या अनेक समर्थकांचा यात समावेश आहे.
आमदार थोरात म्हणाले, चांगल्या कामामुळे संगमनेर तालुक्याचा राज्यात आणि देशात सन्मान झाला आहे. तालुक्यातील जनतेचे प्रेम आणि नेतृत्वाचा विश्वास यामुळे राज्य आणि राष्ट्रीय पातळीवर काम करण्याची मोठी संधी आपल्याला मिळाली. यामध्ये तालुक्यातील जनतेचा आणि कार्यकर्त्यांचा मोठा वाटा राहिला आहे. तालुक्यात कार्यकर्त्यांची अत्यंत चांगली फळी आहे. सर्व सहकारी संस्था चांगल्या सुरू आहेत. येथील राजकारण, समाजकारण राज्याला दिशादर्शक आहे. काम करणाऱ्याला संधी मिळत असून कधीही भेदभाव केला जात नाही. कार्यकर्त्यांना कायम सन्मान आहे.
याउलट अनेक ठिकाणी स्वार्थी राजकारण असते. संगमनेरमध्ये मात्र सन्मानाचे राजकारण असते. रामदास शेजुळ यांनी व्यक्तिगत टीका टिप्पणी कधी केली नाही. तालुक्याच्या विकासात खोडा घालण्याचे काम अनेक लोक करत आहेत. अशांतता निर्माण करत आहेत. परंतु आता जनतेने त्यांना ओळखले आहे. विकासाची व चांगल्या कामाची तालुक्याची ओळख असल्याने हीच परंपरा आपल्याला पुढे घेऊन जायची आहे.
ॲड. शेजुळ म्हणाले… स्वगृही परतल्याचा मला आनंद आहे. स्वातंत्र्य सेनानी सहकार महर्षी भाऊसाहेब थोरात यांचा मी निष्ठावंत कार्यकर्ता. परंतु मित्र प्रेमामुळे मी विकासाच्या राजकारणापासून बाजूला गेलो. भाजपमध्येही अत्यंत निष्ठेने काम केले. परंतु त्या ठिकाणी स्वार्थ आहे.
आमदार थोरात व थोरात घराणे हे निस्वार्थी काम करत आहे. त्यांच्या चांगल्या कामाचा राज्यभर लौकिक आहे. आणि आपण कुठेतरी विरोध करतो आहोत याची खंत मनामध्ये होती. विरोधात असणारे अनेक जण स्वच्छ व सुसंस्कृत नेतृत्व असणारे थोरात यांचा व्यक्तिगत आदर करतात. यापुढील काळात काँग्रेस पक्षाचे निष्ठेने काम करू.
यावेळी गबाजी खेमनर, लक्ष्मण वर्पे, कारभारी साबळे, दत्तात्रय थोरात, अण्णासाहेब थोरात, संदीप नागरे, पुजाहारी दिघे, भाऊसाहेब साबळे, दगडू शिंदे, दादा शेपाळ, दगडू शेपाळ, अनिल साबळे, दत्तू वर्पे, अमोल साबळे, कैलास गोराणे, अमोल वर्पे, मुरलीधर थोरात, नारायण थोरात, डॉ तुषार दिघे आदिसह कार्यकर्ते उपस्थित होते.
