सोमवार दि. २५ मार्च, मुंबई
लोकसभा उमेदवारीनंतर प्रामुख्याने पुढे आलेल्या विखे पिता-पुत्र आणि आमदार राम शिंदे यांच्यातील वादात मध्यस्थी करण्यासाठी उपमुख्यमंत्री देवेंद्र फडणवीस यांच्या ‘सागर’ बंगल्यावर मंथन करण्यात आले. या बैठकीत विखे पिता पुत्र आणि शिंदे यांच्यातील वादावर तोडगा काढत मतभेद मिटले असले तरी मनभेद कायम असल्याचे समोर आले आहे.
अहमदनगर दक्षिण लोकसभा मतदार संघामधून विद्यमान खासदार डॉ. सुजय विखे पाटील यांना भारतीय जनता पक्षाने पुन्हा उमेदवारी जाहीर केल्यानंतर याच मतदारसंघातून इच्छुक असलेले विधान परिषदेचे आमदार राम शिंदे यांनी नाराजी व्यक्त केली होती. पाठोपाठ त्यांनी पाथर्डीमध्ये झालेल्या बैठकीवेळी देखील अनुपस्थिती दर्शविल्याने विखेंसोबतचा वाद आणखी स्पष्ट झाला होता. दरम्यान शिंदे यांनी आपण उपमुख्यमंत्री फडणवीस यांच्याशी केलेल्या चर्चा नंतर निर्णय घेणार असल्याचे सांगितले होते.
या पार्श्वभूमीवर उपमुख्यमंत्री फडणवीस यांच्या सागर बंगल्यावर बैठक झाली. महसूल मंत्री राधाकृष्ण विखे पाटील, खासदार डॉ. सुजय विखे पाटील या पिता-पुत्रांसह आमदार राम शिंदे या बैठकीला उपस्थित होते. बैठकीत आपली नाराजी स्पष्ट करताना शिंदे यांनी विखे यांच्या विरोधातील तक्रारींचा पाढाच उपमुख्यमंत्री फडणवीस यांच्यासमोर वाचला.
प्रधानमंत्री मोदींनी दिलेला ‘अबकी बार ४०० पार’चा नारा पूर्ण करण्यासाठी आमदार शिंदे यांनी आपली नाराजी बाजूला ठेवत सुजय विखे यांना निवडणुकीत मदत करण्याचे आदेश देतानाच विखे पिता-पुत्रांना देखील समज दिल्याची माहिती समोर येत आहे.
बैठकीनंतर माध्यमांशी बोलताना शिंदे म्हणाले, उपमुख्यमंत्री फडणवीस यांनी विखेंबद्दल असलेल्या माझ्या सगळ्या तक्रारी ऐकून घेतल्या. विखेंसोबत असलेले मतभेद विसरून प्रधानमंत्री मोदींनी दिलेला ‘अबकी बार ४०० पार’चा नारा पूर्ण करण्यासाठी कामाला लागण्याच्या सूचना दिल्या. मी भाजपाचा निष्ठावंत कार्यकर्ता असल्याने पंतप्रधान मोदींचा शब्द पूर्ण करण्यासाठी काम करणार आहे. मी विखे यांच्या आधीपासूनचा भाजपाचा निष्ठावंत कार्यकर्ता आहे. त्यामुळे पक्षादेश पाळण्याविषयी नव्याने मला काही सांगण्याची गरज नाही असा देखील टोला विखे पिता-पुत्रांना लगावला.
उपमुख्यमंत्री फडणवीस यांनी यशस्वी मध्यस्थी केल्यानंतर पक्षीय पातळीवरचे आमचे मतभेद मिटले आहे. आमच्यात वैयक्तिक पातळीवर काही मतभेद असले तरी ते राजकारणात काढायचे नसतात. मी घरंदाज निष्ठावंत भाजपचा कार्यकर्ता आहे, असं देखील विखेंना उद्देशून शिंदे म्हणाले.
