शुक्रवार दि. २८ मार्च, संगमनेर
तिथीनुसार पारंपारिक शिवजयंती उत्सव मोठा जल्लोषात संगमनेरकर साजरा करत असतात. शिवजयंती उत्सव समिती, शहर शिवसेना प्रणित बाळासाहेब ठाकरे मित्र मंडळ, रंगारगल्ली शिवसेना शाखेसह शहर व उपनगरात मोठा उत्साहात दिवसभर कार्यक्रमांचे आयोजन केले जाते. यावर्षी संगमनेरमध्ये घडलेल्या तणावपूर्ण घटनांच्या पार्श्वभूमीवर प्रशासनाच्या मदतीने शिस्तीचे पालन करत शिवजयंती उत्सव साजरा केल्याबद्दल शिवसेनेचे माजी शहर प्रमुख अमर कतारी यांनी सर्वांचे आभार मानले आहे.
प्रशासनाने अत्यंत काटेकोरपणे केलेले नियोजन आणि संवेदनशील असलेले वातावरण पाहता शिवजयंती उत्सव समितीच्या बाईक रॅलीस आणि अमर कतारी संस्थापक अध्यक्ष असलेल्या हिंदूहृदयसम्राट सरसेनापती बाळासाहेब ठाकरे मित्र मंडळाच्या पारंपरिक मिरवणुकीला अधिकृतपणे पोलीस प्रशासनाने परवानगी दिली होती.
परवानगी दिल्यावरदेखील शिवसेना संगमनेर शहराच्यावतीने छत्रपती शिवाजी महाराजांची पूर्णाकृती मूर्ती मुख्य मिरवणुकीत सहभागी करण्यासाठी शहर शिवसेनेच्या काही पदाधिकाऱ्यांनी हट्ट धरला. मात्र पोलीस प्रशासनाने मध्यस्थी करून हिंदुहृदय सम्राट सरसेनापती बाळासाहेब ठाकरे मित्र मंडळ यांना मिरवणुकीत मानाचे पहिले स्थान दिले व त्यानंतर संगमनेर शहर शिवसेनेच्या मिरवणुकीला दुसरे स्थान दिले व वाद मिटवला. हिंदुहृदय सम्राट सरसेनापती बाळासाहेब ठाकरे मित्र मंडळाच्या मिरवणुकीत सर्वपक्षीय नेते कार्यकर्ते यांना मानसन्मान देण्यात आला व मिरवणूक शांततेत पार पडली.
भव्य अश्या बाईक रॅलीची सुरुवात चंद्रशेखर चौकातून झाली. शहर व तालुक्यातील शेकडो युवक रॅलीत सहभागी झाले. संध्याकाळी पारंपरिक शिवजयंती मिरवणूकीला संगमनेर नगरपालिकेपासून प्रांताधिकारी शैलेश हिंगे, तहसीलदार धीरज मांजरे, पोलीस उपाधीक्षक सोमनाथ वाघचौरे, पोलीस निरीक्षक भगवान मथुरे, मुख्याधिकारी राहुल वाघ आदी प्रमुख अधिकाऱ्यांच्या उपस्थितीत प्रारंभ झाला.
यावेळी हिंदूहृदयसम्राट बाळासाहेब ठाकरे मित्र मंडळासोबतच संगमनेर शिवसेना ठाकरे गट व शिंदे गट आणि उत्सव समिती सहभागी झाली होती. प्रचंड जल्लोषात मिरवणूक पार पाडली. यावेळी कतारी यांच्यासह मंडळाचे अध्यक्ष त्रिलोक कतारी, भाऊसाहेब हासे, अमित फटांगरे, प्रथमेश बेल्हेकर, अमित चव्हाण, दीपक साळुंखे, राजू सातपुते, अमोल डुकरे, शिवसेनेचे आप्पा केसेकर जालिंदर लहांमगे, योगेश बिचकर, शिंदे गटाचे रमेश काळे, शिवजयंती उत्सव युवक समितीचे अध्यक्ष सागर बागे, मोटरसायकल रॅली प्रमुख साजन कतारी, पप्पू नेहुलकर, शैलेश कलंत्री, अंबादास आडेप, मंगेश सालपे, कपिल टाक, मनीष माळवे, कल्पेश पोगुल, नरेश माळवे आदिल्स संगमनेरकर नागरिक मोठ्या संख्येने उपस्थित होते.
