गुरुवार, दि.१८ एप्रिल
राज्य महिला आयोगाच्या सदस्य, काँग्रेसच्या महासचिव पदासह सर्व पदांचा राजीनामा देणाऱ्या उत्कर्षा रुपवते यांनी अखेर वंचित बहुजन आघाडीत प्रवेश केला आहे. शिर्डी लोकसभा मतदारसंघातून वंचित कडून त्यांना उमेदवारी मिळण्याची शक्यता वर्तवली जात आहे. रुपवते वंचितच्या उमेदवार असल्यास या मतदारसंघातील राजकीय गणित बदलणार असून त्याचा सर्वाधिक फटका महाविकास आघाडीला बसण्याची चिन्ह आहेत.
बुधवारी रुपवते यांनी काँग्रेस अध्यक्ष मल्लिकार्जुन खर्गे यांना आपल्या सर्व पदांचा राजीनामा पाठवल्यानंतर पाठोपाठ त्यांनी अकोल्यात वंचित बहुजन आघाडीचे अध्यक्ष प्रकाश आंबेडकर यांची भेट घेतली. या भेटीत त्यांनी आंबेडकरांच्या यशवंत भवन निवासस्थानी वंचित मध्ये प्रवेश केला असून आंबेडकर यांनी त्यांचे स्वागत केले आहे. यावेळी वंचितचे राज्य उपाध्यक्ष प्राध्यापक किसन चव्हाण, जिल्हाध्यक्ष विशाल कोळगे उपस्थित होते.
महाविकास आघाडी कडून विशेषतः काँग्रेस कडून शिर्डी लोकसभा निवडणूक लढविण्यासाठी रूपवते इच्छुक होत्या. त्या दृष्टीने त्यांनी प्रयत्न देखील केले होते. मात्र जागा वाटपात ही जागा शिवसेना (उद्धव बाळासाहेब ठाकरे) गटाच्या वाट्याला आली. शिवसेनेकडून या जागेवर माजी खासदार भाऊसाहेब वाकचौरे यांना उमेदवारी देण्यात आले. शिवसेना, काँग्रेस, भाजप पुन्हा शिवसेना असे पक्षांतर करणाऱ्या वाकचौरे यांच्या बद्दल मतदार संघात फारशी सहानुभूती नाही त्यामुळे ही जागा काँग्रेसला मिळावी अशी अपेक्षा होती. उमेदवार बदलला जात नसल्याचे स्पष्ट होताच रूपवते यांनी काँग्रेसचा ‘हात’ सोडण्याचा निर्णय घेतला. रुपवते काँग्रेसचे ज्येष्ठ नेते बाळासाहेब थोरात यांच्या निकटवर्तीय असल्याने थोरात आणि काँग्रेससाठी हा मोठा धक्का मानला जातो.
शिर्डी लोकसभा मतदारसंघातील अकोले, संगमनेर सह अन्य तालुक्यात मोठा जनसंपर्क असलेल्या रूपवते परिवाराला मानणारा मोठा वर्ग या मतदारसंघात आहे. त्यामुळे याचा फायदा रुपवते यांना होऊ शकतो. उत्कर्षा रुपवते या काँग्रेसचे दिवंगत नेते माजी मंत्री दादासाहेब रुपवते, माजी मंत्री मधुकरराव चौधरी यांची नात, दिवंगत काँग्रेस नेते प्रेमानंद रुपवते व स्नेहजाताई रुपवते यांच्या कन्या आहेत.
