मंगळवार, दि. ७ मे
शिर्डी लोकसभा मतदारसंघातील वंचित बहुजन आघाडीच्या उमेदवार उत्कर्षा रुपवते यांच्या वाहनावर सोमवारी रात्री दगडफेक करत रुपवते यांच्यावर हल्ल्याचा प्रकार समोर आला आहे. अकोले तालुक्यातील चितळवेढे गावात ही घटना घडली. या हल्ल्यात रूपवते सुदैवाने बचावल्या आहेत.
राज्यात मंगळवारी तिसऱ्या टप्प्यासाठी मतदान सुरू असताना हा प्रकार समोर आल्याने खळबळ उडाली आहे. दरम्यान रूपवते यांनी आपण हल्ल्यातून बचावला असून सुरक्षित असल्याचे सांगितले आहे
मिळालेल्या माहितीनुसार उत्कर्षा रुपवते अकोले तालुक्यातील प्रचार दौरा आटोपून सोमवारी रात्री परतत होत्या. रात्री दहा वाजण्याच्या सुमारास त्या प्रचार सभा आटोपून अकोले तालुक्यातील चितळवेढे गावाजवळ आले असता अज्ञात हल्लेखोरांनी त्यांच्या वाहनावर दगडफेक करत रुपवते यांच्यावर हल्ल्याचा प्रयत्न केला. यावेळी रूपवते आपल्या वाहनात फोनवर बोलत होत्या. अचानक झालेल्या दगडफेकीमुळे वाहनाच्या काचा फुटल्या. सुदैवाने या वाहनाच्या फुटलेल्या गाडीत आणि त्यांच्या अंगावर सर्वत्र विखुरल्या गेल्या. सुदैवाने या रुपवते यांच्या डोळ्यात गेल्या नाही.
दोघा हल्लेखोरांनी हा प्रकार केला असल्याची माहिती समोर येत असून रूपवते यांनी तातडीने राजुर पोलिसांना याची माहिती दिली. दरम्यान या प्रकाराची माहिती समजताच पोलीस आणि वंचित आघाडीचे कार्यकर्ते मोठ्या संख्येने घटनास्थळी पोहोचले होते. आक्रमक कार्यकर्त्यांना पोलिसांनी शांत केले असून या घटनेचा तपास सुरू केला आहे.
