बुधवार, दिनांक १२ जून २०२४
नाशिक विभाग शिक्षक मतदार संघातून अपक्ष उमेदवारी करणाऱ्या विवेक कोल्हे यांच्या संस्थांवर शासनाच्या विविध विभागाकडून छापे टाकण्यात आले असून शासनाची विविध पथके कोपरगावात कोल्हे यांच्याशी संबंधित संस्थांची चौकशी करत असल्याची माहिती समोर येत आहे.
विशेष म्हणजे कोल्हे हे भाजपच्या माजी आमदार स्नेहलता कोल्हे यांचे सुपुत्र आहेत. कोल्हे यांनी अपक्ष उमेदवारी अर्ज दाखल केला आहे. कोल्हे यांच्या उमेदवारीमुळे या मतदारसंघातील सत्ताधाऱ्यांची गणित बिघडण्याची शक्यता वर्तवली जात आहे.
राज्य उत्पादन शुल्क, शिक्षण विभाग आदींसह शासनाची विविध पथके या संदर्भात चौकशी करत असून कोल्हे यांनी नाशिक विभाग शिक्षक मतदार संघातून उमेदवारी करण्याचा निर्णय कायम ठेवल्याने ही कारवाई झाल्याचे बोलले जात आहे.
महाराष्ट्र टाइम्सने यासंदर्भात वृत्त दिले आहे. कोपरगावच्या सहकार महर्षी शंकरराव कोल्हे सहकारी साखर कारखान्यावर विविध शासकीय विभागाच्या पथकांनी छापे मारले आहे. शिक्षण विभागाचे पथक देखील संजीवनी शिक्षण संस्थेच्या कागदपत्रांची तपासणी करत आहेत. गेल्या काही तासांपासून या दोन्ही संस्थांमधील कर्मचाऱ्यांची देखील चौकशी सुरू असून अद्याप तरी काही अनियमित्ता आढळली नसल्याची माहिती समजत आहे.
छत्रपती संभाजीनगर, पुणे, सोलापूर येथील पथके ३ जून पासून यासंदर्भात चौकशी करत असल्याची माहिती समजत आहे. या संदर्भात अद्याप तरी कोणतीही अधिकृत माहिती संबंधितांकडून देण्यात आलेली नाही.
