गुरुवार, दिनांक १३ जून २०२४
संगमनेरच्या उपनगरातील मालदाड रोडवरील रहिवासी असलेला तरुण महेश अरुण पडघलमल (वय ३४ वर्षे) हा गाडीवर क्लीनर म्हणून गुजरातमध्ये गेला. तो अंकलेश्वर येथून बेपत्ता झाल्याची माहिती समोर आली असून त्याच्या कुटुंबीयांनी अंकलेश्वर पोलीस ठाण्यात या संदर्भात तक्रार दाखल केली आहे. सात दिवसांचा कालावधी उलटून देखील अद्याप त्याचा शोध लागलेला नाही.
महेश पडघलमल हा मालवाहतूक गाडीवर क्लीनर म्हणून काम करत असून सोमनाथ माधव सातपुते याच्याबरोबर तो ३ जूनला गुजरातच्या अंकलेश्वर येथे गेला होता. मात्र पाच तारखेला तो बेपत्ता झाल्याची माहिती सोमनाथ सातपुते यांनी महेश पडघलमल याच्या घरी दूरध्वनी करून कळविली होती.
त्यामुळे कुटुंबियांनी तातडीने अंकलेश्वर येथे जात त्याचा शोध घेण्याचा प्रयत्न केला तसेच अंकलेश्वर पोलीस ठाण्यात तो बेपत्ता झाल्याचे फिर्याद दाखल केली आहे. दरम्यान अद्यापही महेश पडघलमल याचा शोध लागत नसल्याने कुटुंबातील सदस्य चिंतेत आहे. त्यामुळे त्याचा घातपात तर झाला नाही ना अशी भीती देखील पडघलमल याच्या भावाने व्यक्त केली आहे.
दरम्यान या संदर्भात पडघलमल याच्या कुटुंबीयांनी संगमनेर शहर पोलीस ठाण्यात पोलीस अधिकाऱ्यांची भेट घेत त्याचा शोध घेण्याची विनंती केली मात्र कार्यक्षेत्राच्या मर्यादेमुळे स्थानिक पोलिसांना कोणताही हस्तक्षेप करता येणार नाही, गुजरात पोलिसांच्या मदतीने शोधकार्य करावे लागेल, अशी माहिती देखील पोलिसांनी त्यांना दिली.
