गुरुवार, २७ जून
भाजपचे ज्येष्ठ नेते, माजी उपपंतप्रधान आणि भारतरत्न लालकृष्ण अडवाणी यांना बुधवारी दिल्लीतील एम्समध्ये दाखल करण्यात आले आहे. रात्री १०.३० वाजता त्यांना एम्समध्ये आणण्यात आले. त्यांना एम्सच्या जुन्या खासगी वॉर्डात ठेवण्यात आले असून त्यांना यूरोलॉजीशी संबंधित समस्या असल्याने युरोलॉजीचे अमलेश सेठ त्यांच्यावर उपचार करत आहेत.
एम्सने आपल्या जारी केलेल्या निवेदनात म्हटले आहे की लालकृष्ण अडवाणी यांची प्रकृती स्थिर असून त्यांना निरिक्षणाखाली ठेवण्यात आले आहे.
लालकृष्ण अडवाणी यांना यावर्षी भारत सरकारने भारतरत्न हा देशाचा सर्वोच्च नागरी पुरस्कार प्रदान केला आहे. ते देशाचे उपपंतप्रधानही राहिले आहेत. अडवाणी १९४२ मध्ये राष्ट्रीय स्वयंसेवक संघात ते सामील झाले. स्वातंत्र्यानंतर महापालिका निवडणुकीच्या माध्यमातून अडवाणींनी राजकारणात प्रवेश केला. एप्रिल १९७० मध्ये पहिल्यांदा ते राज्यसभेत पोहोचले.
कराचीमध्ये जन्म…
लालकृष्ण अडवाणी यांचा जन्म ८ नोव्हेंबर १९२७ रोजी सिंध प्रांतात (पाकिस्तान) झाला. त्यांनी कराची येथील सेंट पॅट्रिक स्कूलमध्ये शिक्षण घेतले. १९४२ मध्ये त्यांनी भारत छोडो आंदोलनादरम्यान गिदुमल नॅशनल कॉलेजमध्ये प्रवेश घेतला. त्यानंतर १९४४ मध्ये त्यांनी मॉडेल हायस्कूल, कराची येथे शिक्षक म्हणून काम केले.
१९४७ मध्ये देशाच्या फाळणीनंतर अडवाणींच्या कुटुंबाला आपले घर सोडून भारतात यावे लागले. मुंबईच्या शासकीय विधी महाविद्यालयातून त्यांनी कायद्याची पदवी घेतली. या काळात ते संघाशीही जोडले गेले. किशनचंद अडवाणी यांच्या पोटी जन्मलेल्या लालकृष्ण अडवाणी यांनी २५ फेब्रुवारी १९६५ रोजी कमला अडवाणी यांच्याशी विवाह केला. त्यांना दोन मुले आहेत, त्यांची नावे प्रतिभा आणि जयंत आहेत.
