मंगळवार ०९ जुलै | संगमनेर
समाजातील अनेक घटकांसाठी जिव्हाळ्याचे असलेल्या व आर्थिक विकासाची गंगोत्री समजल्या जाणार्‍या संगमनेर मर्चंट बँकेच्या अध्यक्षपदी माजी नगरसेवक राजेंद्र वाकचौरे, उपाध्यक्षपदी मुकेश कोठारी यांची बिनविरोध निवड करण्यात आली.
अध्यक्ष, उपाध्यक्ष निवडीसाठी संगमनेर मर्चंट बँकेच्या स्वामी विवेकानंद सभागृहात सहाय्यक उपनिबंधक तथा निवडणूक निर्णय अधिकारी अमोल वाघमारे यांच्या अध्यक्षतेखाली संचालकांची बैठक बोलाविण्यात आली होती. या बैठकीत एकमताने दोन्ही निवडी करण्यात आल्या.
यावेळी बँकेचे प्रमुख मार्गदर्शक उद्योजक राजेश मालपाणी म्हणाले, संगमनेर मर्चंट्स बँकेच्या लोकाभिमुख आणि वेगवान सेवेमुळे दिवसेंदिवस बँकेकडे अधिकाधिक ग्राहक आकर्षित होत असून बँकेच्या परिपूर्ण सेवेमुळे समाधानी होत आहेत. ग्राहकांची जिंकलेली मने आणि मिळवलेला विश्वास हाच बँकेचा सर्वश्रेष्ठ पुरस्कार आहे. सलग सहा दशके असा अनोखा पुरस्कार मिळवून जनतेच्या मनातील अढळस्थान टिकविण्याची किमया बँकेने करुन दाखविली आहे.
स्वर्गीय ओंकारनाथजी मालपाणी यांनी आपल्या समविचारी सहकार्‍यांना सोबत घेऊन उदात्त भावनेने स्थापन केलेल्या बँकेचा मोठा विस्तार झाला आहे. भक्कम लोकाश्रय मिळाल्याने बँक प्रत्येक घटकाला आपल्या जिव्हाळ्याची आर्थिक संस्था वाटते. बदलत्या काळासोबत अत्याधुनिक तंत्राचा अचूक वापर केल्याने अनेक नामांकित बँकांच्या आक्रमणात देखील बँकेने प्रगतीचे घोडदौड कायम राखली आहे.
मागील सहा दशकांच्या वाटचालीत बँकेच्या आर्थिक सहाय्याने शेकडो व्यापारी, व्यावसायिक, उद्योजक यांनी आपापल्या क्षेत्रात गरुड भरारी घेतली आहे. मर्चंट्स बँक म्हणजे हजारो सभासद, ठेवीदार, खातेदार, कर्जदार व हितचिंतक मिळून बनलेला मोठा परिवार आहे. नूतन अध्यक्ष वाकचौरे आणि उपाध्यक्ष कोठारी बँकेच्या नावलौकिकात आणखी भर घालतील असा विश्वास व्यक्त केला.
नूतन उपाध्यक्ष कोठारी यांनी संचालकपदाच्या पहिल्याच कारकिर्दीत संस्थेने आपल्यावर विश्वास दाखवला व बँकेच्या उपाध्यक्षपदी बिनविरोध निवडून दिल्याबद्दल कृतज्ञता व्यक्त केली. यावेळी राजेंद्र वाकचौरे व मुकेश कोठारी यांनी मावळते अध्यक्ष संतोष करवा व उपाध्यक्ष प्रकाश कलंत्री यांचा सत्कार केला.
अध्यक्षपदाच्या कार्यकाळात बँकेचे सर्व अधिकारी व कर्मचार्‍यांची मोलाची साथ मिळाली. कार्यक्षेत्रातील जवळजवळ सर्वच विभागामध्ये बँकेने उत्कृष्ट प्रगती साधली अशी भावना मावळते अध्यक्ष संतोष करवा व्यक्त केली. प्रकाश कलंत्री यांनी नवनिर्वाचित पदाधिकार्‍यांना शुभेच्छा दिल्या. यावेळी श्रीगोपाल पडताणी, प्रकाश राठी, संजय राठी, दिलीप पारख, गुरुनाथ बाप्ते आदी संचालकांनी मनोगत व्यक्त केले.
बँकेचे मुख्य कार्यकारी अधिकारी, सहायक मुख्याधिकारी, आजी-माजी संचालक, सभासद, ग्राहक व हितचिंतकांनी नूतन पदाधिकार्‍यांचे अभिनंदन केले. मधुसुधन नावंदर यांनी सूत्रसंचालन तर, मुकेश कोठारी यांनी आभार मानले.
विश्वास सार्थ ठरवणार…
बँकेच्या चेअरमनपदी काम करण्याची दुसर्‍यांदा संधी दिल्याबद्दल वाकचौरे यांनी संचालक मंडळाचे आभार मानले. संचालक मंडळाने सोपवलेली जबाबदारी आणि मार्गदर्शक राजेश मालपाणी यांनी दाखवलेला विश्वास नक्कीच सार्थ करुन दाखवू. – राजेंद्र वाकचौरे, नूतन अध्यक्ष.
