शनिवार २० जुलै
केंद्रीय लोकसेवा आयोगाचे (यूपीएससी) अध्यक्ष मनोज सोनी यांनी आपल्या पदाचा राजीनामा दिला असल्याची माहिती समोर आली आहे. त्यांनी आपल्या वैयक्तिक कारणास्तव हा राजीनामा दिला असल्याचे सांगण्यात येत आहे. परंतु, पूजा खेडकर प्रकरणामुळे सोनींनी राजीनामा तर दिला नाही ना, याबाबतदेखील आता अनेक तर्क वितर्क लढवले जात आहेत.
सोनी यांनी गेल्यावर्षीच यूपीएससीच्या अध्यक्षपदाचा पदभार स्वीकारला होता. त्यामुळे त्यांचा कार्यकाळ आणखी चार वर्षांनी २०२९ मध्ये संपणार होता. परंतु, त्यांनी कार्यकाळ पूर्ण होण्याआधीच अचानकपणे राजीनामा दिल्याने यूपीएससी चर्चेत आली आहे. या राजीनाम्याचा अर्थ खेडकर प्रकरणाशीही लावला जात असल्याने खळबळ उडाली आहे. सोनी २०१७ साली केंद्रीय लोकसेवा आयोगाच्या घटनात्मक मंडळाचे सदस्य झाले. त्यानंतर १६ मे २०२३ रोजी त्यांची लोकसेवा आयोगाच्या अध्यक्षपदी नियुक्ती झाली.
महत्त्वाची बाब म्हणजे यूपीएससी अध्यक्ष मनोज सोनी यांनी महिन्याभरापूर्वीच राष्ट्रपतींकडे आपला राजीनामा सुपूर्द केला होता. परंतु, त्यांच्या या राजीनाम्यावर अद्याप कोणता निर्णय घेण्यात आलेला आहे की नाही, याबाबतची कोणतीही माहिती समोर आलेली नाही. परंतु, वादग्रस्त आयएएस अधिकारी पूजा खेडकर यांचे प्रकरण समोर आल्यामुळेच त्यांनी या अध्यक्षपदाचा राजीनामा देत या प्रकरणातून काढता पाय घेतल्याची चर्चा करण्यात येत आहे. तर, धक्कादायक बाब म्हणजे, पूजा खेडकर यांचे फसवणुकीचे प्रकरण समोर आल्यानंतर सोशल मीडियावर अनेक बोगस आयएएस अधिकाऱ्यांची प्रकरणे समोर येत आहेत. ओबीसी आणि आर्थिक मागास प्रवर्गाचा फायदा घेऊन काहींनी यूपीएससी परीक्षेत लाभ मिळविल्याचा आरोप करण्यात आला आहे. त्यामुळेच की काय सोनी यांनी तडकाफडकी राजीनामा देण्याचा तर निर्णय घेतला नाही ना, असेही आता बोलले जात आहे.
