गणेश मूर्ती आगमन मिरवणुकीत कर्णकर्कश साऊंड सिस्टीम वाजवल्याप्रकरणी दोघांवर गुन्हा दाखल; सिस्टीम जप्त करून १५ हजारांचा दंड

Annant Ppangarkar

महाराष्ट्र संवाद न्यूज ऑनलाईन –

आगामी गणेशोत्सवाच्या पार्श्वभूमीवर श्रीरामपूर शहरातील प्रभाग क्रमांक ३ मधील बालिका विद्यालयाजवळ, शिवसर्कल चौक येथे काढण्यात आलेल्या गणेश मूर्ती आगमन मिरवणुकीत पोलिसांच्या नियमांचे उल्लंघन करत मोठ्या आवाजात साऊंड सिस्टीम वाजवल्याप्रकरणी गणेश मंडळाचे अल्पवयीन अध्यक्ष आणि ‘शिवज्ञा साऊंड सिस्टीम’चे मालक निलेश दगडू पाटील यांच्याविरुद्ध श्रीरामपूर शहर पोलीस ठाण्यात गुन्हा नोंदवण्यात आला आहे.

मिळालेल्या माहितीनुसार, ११ सप्टेंबर २०२६ रोजी सायंकाळी ७:०० ते ९:३० वाजेच्या दरम्यान टाटा एस ट्रक (क्रमांक MH 46 AF 6580) वर साऊंड सिस्टीम लावून अत्यंत कर्णकर्कश आवाजात गाणी वाजवली जात होती. यामुळे परिसरात मोठ्या प्रमाणावर ध्वनी प्रदूषण निर्माण झाले होते. बंदोबस्तावर तैनात असलेल्या पोलीस अधिकारी व अंमलदारांनी आवाज कमी करण्याबाबत वारंवार सूचना दिल्या होत्या. मात्र, या सूचनांकडे जाणीवपूर्वक दुर्लक्ष करत सार्वजनिक शांततेचा भंग करण्यात आला.

याप्रकरणी पोलिसांनी भारतीय न्याय संहिता (BNS) कलम २२३, २७०, २९२ सह मोटर वाहन कायदा कलम १८२ A/१९(४) अन्वये गुन्हा नोंदवला आहे. पोलिसांनी घटनास्थळावरून साऊंड सिस्टीम जप्त केली असून, प्रादेशिक परिवहन अधिकारी (RTO) श्रीरामपूर यांच्यामार्फत साऊंड सिस्टीमच्या मालकाला १५,००० रुपयांचा दंड ठोठावण्यात आला आहे.

ही कारवाई पोलीस अधीक्षक मुम्मका सुदर्शन, अपर पोलीस अधीक्षक सोमनाथ वाकचौरे आणि उपविभागीय पोलीस अधिकारी जयदत्त भवर यांच्या मार्गदर्शनाखाली पोलीस निरीक्षक विशाल चंद्रकांत खैरे यांच्या नेतृत्वाखालील पोलीस पथकाने केली. या प्रकरणी पोलीस काॉन्स्टेबल पांडुरंग चौधरी हे पुढील अधिक तपास करत आहेत.