माजी मंत्री थोरात आणि डॉ. तांबे यांनी घेतली पद्मभूषण अण्णा हजारे यांची भेट; प्रकृतीची केली चौकशी

Annant Ppangarkar

महाराष्ट्र संवाद न्यूज ऑनलाईन-

ज्येष्ठ गांधीवादी विचारवंत पद्मभूषण अण्णा हजारे यांची काँग्रेस पक्षाचे वरिष्ठ नेते, माजी महसूलमंत्री आमदार बाळासाहेब थोरात आणि माजी आमदार डॉ. सुधीर तांबे यांनी राळेगणसिद्धी येथे जाऊन सदिच्छा भेट घेतली. मुंबई येथील बॉम्बे हॉस्पिटलमध्ये उपचारांनंतर अण्णा नुकतेच राळेगणसिद्धी येथे परतले आहेत. या पार्श्वभूमीवर थोरात व तांबे यांनी अण्णांच्या प्रकृतीची अत्यंत आपुलकीने चौकशी करत त्यांना दीर्घायुष्य आणि उत्तम आरोग्य लाभावे, अशी प्रार्थना केली.

शनिवारी झालेल्या या भेटीदरम्यान अण्णांच्या प्रकृतीची विचारपूस करताना माजी महसूलमंत्री बाळासाहेब थोरात म्हणाले, पद्मभूषण अण्णा हजारे हे अहिल्यानगर जिल्ह्यासह संपूर्ण महाराष्ट्राचे भूषण आहेत. सामाजिक, राजकीय, पर्यावरण आणि ग्रामीण विकास या क्षेत्रांतील त्यांचे योगदान आगामी अनेक पिढ्यांसाठी प्रेरणादायी राहील. याचवेळी राज्यातील बळीराजाच्या परिस्थितीवर चिंता व्यक्त करत थोरात म्हणाले, दीर्घ उघडीपीमुळे शेतकरी अडचणीत आहे. या संकटसमयी सरकारने शेतकऱ्यांच्या पाठीशी खंबीरपणे उभे राहावे. गणेशोत्सवाच्या काळात राज्यात समाधानकारक पाऊस व्हावा, अशी प्रार्थना करतो.

या प्रसंगी माजी आमदार डॉ. सुधीर तांबे यांनीही अण्णांबद्दल आदर व्यक्त केला. अण्णा हजारे हे आपल्या सर्वांचेच श्रद्धास्थान आहेत. ते उपचारांनंतर पुन्हा राळेगणसिद्धीमध्ये परतल्याने दिलासा मिळाला असून त्यांचे मार्गदर्शन सर्वांना असेच सतत मिळत राहो, अशी भावना तांबे यांनी व्यक्त केली.

या भेटीबद्दल कृतज्ञता व्यक्त करताना पद्मभूषण अण्णा हजारे म्हणाले, महाराष्ट्राच्या राजकारणात माजीमंत्री बाळासाहेब थोरात यांचे योगदान मोलाचे असून स्वच्छ आणि पारदर्शक नेतृत्व म्हणून त्यांची ओळख आहे. थोरात व तांबे यांच्या या भेटीमुळे आनंद वाटला.

या भेटीदरम्यान उपस्थित कार्यकर्ते आणि ग्रामस्थांनी अण्णा हजारे, थोरात आणि डॉ. तांबे यांच्यासोबत विविध विषयांवर चर्चा केली.