गुरुवार, ०८ ऑगस्ट
संगमनेरमधील एचडीएफसी बँकेतून काढलेले दोन लाख रुपये अल्टो कारमधून लंपास करण्याची घटना घडवून आठ दिवसांचा कालावधी उलटला असून संगमनेर पोलिसांना अद्यापही चोरट्यांचा शोध लावण्यात अपयश आले आहे. शहरातील चोरीच्या वाढत्या घटनांमुळे पोलिसांचे गुन्हेगारांवरील नियंत्रण संपले असल्याचे समोर आले आहे.
गेल्या काही दिवसांपासून संगमनेरमध्ये अवैध धंद्यांना उधाण आले असून दागिने दुचाकी आणि रोकड रकमेच्या चोऱ्या देखील वाढल्या आहेत. पोलिसांना गुन्ह्यांचा छडा लावण्यात अपयश येत आहे. दुचाकी चोर, धूम स्टाईल दागिने पळविणारे आणि रोकड लंपास करणाऱ्या गुन्हेगारांचा शोध लागत नसल्याने गुन्हेगारांचे फावले आहे.
२ ऑगस्ट रोजी वरवंडी येथील प्रवीण सोन्याबापु वर्पे हे आपला मित्र प्रमोद भाऊसाहेब शिंदे याच्यासोबत संगमनेर येथे शेततळ्याचे कागद घेण्यासाठी मारुती अल्टो ८०० या कारमधून आले होते. संगमनेर मध्ये आल्यानंतर प्रवीण वरपे यांनी एचडीएफसी बँकेतून दोन लाख रुपये काढले होते. त्यानंतर दोघेजण जेवण्यासाठी हॉटेल जोशी मध्ये गेले जेवण झाल्यानंतर दुपारी अडीचच्या सुमारास पैसे हातात असल्याने मित्राच्या सांगण्यावरून फिर्यादीने त्याच्याकडील रोकड गाडीच्या मागील सीट कव्हरमध्ये ठेवली होती.
त्यानंतर दोघेही घुलेवाडी येथील नावंदर टायर या दुकानात टायर घेण्यासाठी गेले होते. टायर घेतल्यानंतर दोघांनी दुकानदाराला ऑनलाईन पैसे दिले. दुकानातून बाहेर आलो तेव्हा मित्राच्या कारच्या डाव्या बाजूची मागील काच फुटलेली दिसली. त्यामुळे मित्राने ११२ क्रमांकाला कॉल केल्यानंतर तेथे पोलीस गाडी आली. पोलिसांसमक्ष गाडीची तपासणी केली असता दोन लाख रुपयांची रोकड लंपास झाल्याचे दिसून आले. त्यामुळे प्रवीण सोन्याबापु वर्पे गाणे संगमनेर शहर पोलीस ठाण्यात दिलेल्या तक्रारीवरून अज्ञात व्यक्त विरोधात गुन्हा दाखल करण्यात आला. मात्र अद्यापही पोलिसांना गुन्हेगारांचा शोध लागू शकलेला नाही.
… तर रस्त्यावर उतरावे लागेल
गेल्या काही दिवसांपासून संगमनेरमध्ये अवैध धंदे मोठ्या प्रमाणात सुरू आहे. या धंद्यांवर कारवाई करण्यात पोलीस टाळाटाळ करतात. त्यामुळे गुन्हेगारीत देखील मोठ्या प्रमाणात वाढ झाली असून रोकड लांबविण्याची घटना देखील त्याचाच एक भाग असावी, असा संशय आहे. त्यामुळे पोलिसांनी गावातील अवैध धंदे पूर्णतः बंद करावेत, असा इशारा काही दिवसांपूर्वीच पोलीस यंत्रणेला दिला होता. मात्र अद्यापही संगमनेर मधील गुन्हेगारीचा आलेख बघता तो उंचावत असल्याने पोलिसांनी होण्याचा चढा लावला नाही तर आरपीआयला (आठवले) लवकरच रस्त्यावर उतरावे लागेल.
कैलास कासार, शहराध्यक्ष, आरपीआय (आठवले)
