बुधवार, १४ ऑगस्ट
विधानसभा निवडणूक तोंडावर असताना काँग्रेसचे दोन आमदार मुख्यमंत्री एकनाथ शिंदे यांच्या शिवसेनेत प्रवेश करण्याची शक्यता वर्तवली जात आहे. या दोन्ही आमदारांनी बुधवारी मुख्यमंत्री एकनाथ शिंदे यांची भेट घेतली आहे. त्यामुळे पक्ष बदलाच्या चर्चेने वेग पकडला आहे.
विधानसभा निवडणुकीच्या पार्श्वभूमीवर राजकीय पक्षांची जोरदार तयारी सुरू झाली आहे. त्याचबरोबर इच्छुकांचीही चाचपणी सुरू आहे. मिळण्याची शक्यता दिसत नसल्याने काही जण पक्ष बदलण्याच्या तयारीत आहेत. तर काहींनी पक्षांतर करण्याचा निर्णयही घेतला आहे. त्या दृष्टीने भेटीगाठी वाढल्या आहेत. विद्यमान आमदारही कोणत्या पक्षाकडून उमेदवारी मिळेल? कोणत्या पक्षाच्या तिकीटावर विजयी होता येईल? विद्यमान पक्ष उमेदवारी देणार की नाही? याची चाचपणी करत आहेत.
अशा स्थितीत काँग्रेसचे दोन विद्यमान आमदार पक्ष सोडण्याच्या तयारीत आहेत. विधानसभा निवडणुकीच्या तोंडावर काँग्रेससाठी हा मोठा धक्का समजला जात आहे. या दोन आमदारांनी नुकतीच मुख्यमंत्री एकनाथ शिंदे यांची भेट घेतली आहे. त्या मुळे हे दोघे शिवसेना शिंदे गटात प्रवेश करतील अशी शक्यता वर्तवली जात आहे.
आमदार हिरामण खोसकर आणि जितेश अंतापूरकर अशी या दोन आमदारांची नावे आहेत. विधान परिषद निवडणुकीत ज्या काँग्रेस आमदारांनी क्रॉस वोटींग केली होती त्यांच्यात या दोघांचाही समावेश होता असा आरोप असून निवडणुकांच्या तोंडावर या दोन्ही आमदारांवर निलंबनाची कारवाई होण्याची शक्यता आहे. त्याबाबतची शिफारसही पक्ष श्रेष्ठीकडे करण्यात आली आहे. त्यामुळे पक्ष कारवाई करण्याआधीच स्वत: पक्ष सोडण्याचा पर्याय या दोघांकडे आहे. त्यामुळेच या दोघांनी मुख्यमंत्री शिंदे यांची भेट घेतल्याचे बोलले जात आहे.
