महाराष्ट्र संवाद न्यूज ऑनलाईन- संगमनेर तालुका म्हणजे काही जणांची जहागीरदारीच झाली होती. जमिनीचा सातबारा उतारा सर्वसामान्य शेतकऱ्यांच्या नावावर असला, तरी प्रत्यक्ष मालकी दुसऱ्यांची असल्यासारखी परिस्थिती निर्माण झाली होती. मात्र, तालुक्यातील जनतेने परिवर्तन घडवून आणत मला काम करण्याची संधी दिली आहे, असे प्रतिपादन आमदार अमोल खताळ यांनी केले.
पिंपळे येथे शिवसेना शाखेच्या उद्घाटन प्रसंगी ते बोलत होते. कार्यक्रमाच्या व्यासपीठावर महायुतीचे पदाधिकारी व शिवसैनिक मोठ्या संख्येने उपस्थित होते.
आमदार खताळ म्हणाले की, सर्वसामान्य जनतेच्या आशीर्वादामुळेच मी आमदार झालो आहे. जनतेच्या सुख-दुःखात सहभागी होऊन त्यांचे प्रश्न सोडविणे हेच माझे कर्तव्य आहे. माझ्याकडे कोणती पदवी आहे यापेक्षा मी जनतेसाठी काय करतो हे महत्त्वाचे आहे. मला माझ्या कुटुंबातील कोणालाही ठेकेदार बनवायचे नाही किंवा मुलाला राजकारणात आणायचे नाही. सर्वसामान्य जनतेने दिलेले प्रेम हीच माझी खरी संपत्ती आहे.
घरकुल योजनांसाठी जागेअभावी अडचणी येत असतील, तर आगामी हिवाळी अधिवेशनात प्रश्न उपस्थित करून पाठपुरावा करेन. सत्ताधारी पक्षाचा आमदार असलो तरी जनतेच्या प्रश्नांसाठी आंदोलन करण्यास मागेपुढे पाहणार नाही, असा इशाराही त्यांनी दिला.
निमोण आणि तळेगाव हा भाग कायम दुष्काळी म्हणून हिणवून काहींनी दोन-तीन पिढ्यांचे नुकसान केले. मात्र, या संधीचे सोने करून संगमनेरचा चेहरामोहरा बदलण्याचा माझा संकल्प आहे. भोजापूरच्या पाण्याचा प्रश्न मार्गी लावून हा दुष्काळी भाग सुजलाम् सुफलाम् केल्याशिवाय मी स्वस्थ बसणार नाही, असा विश्वास त्यांनी व्यक्त केला.
उपमुख्यमंत्री एकनाथ शिंदे यांच्या आवाहनानुसार आमदार खताळ यांनी सत्काराऐवजी गरजूंना मदत करण्याचे आवाहन केले होते. त्यानुसार पिंपळे शिवसेना शाखेच्या वतीने गरीब कुटुंबांना दिवाळी शिधा वाटप करण्यात आला. तसेच अपघातात आई-वडील गमावलेल्या युवराज व पूनम माळी यांना नवीन कपडे आणि ताराबाई माळी यांना साडी प्रदान करून सामाजिक बांधिलकी जपण्यात आली.
कार्यक्रमाचे प्रास्ताविक अंकुश चकोर यांनी केले, सूत्रसंचालन प्रशांत कर्पे यांनी केले तर खंडू वाघ यांनी आभार मानले.
