संगमनेरात दिवाळीच्या तोंडावर उफाळला वाद! एका नगरसेवकामुळे ठाकरेंची शिवसेना आक्रमक; वसुली आणि आरक्षणाच्या मुद्द्यावर खळबळजनक आरोप! गोरगरिबांना त्रास देणारा तो नगरसेवक कोण?

महाराष्ट्र संवाद न्यूज ऑनलाईन-
संगमनेर शहरात दिवाळीच्या पार्श्वभूमीवर दुकानांच्या जागेवरून मोठा वाद निर्माण झाला असून एका नगरसेवकाच्या भूमिकेमुळे शिवसेना उद्धव बाळासाहेब ठाकरे पक्ष आक्रमक झाला आहे. मुख्याधिकारी किंवा नगराध्यक्ष मोठे की हा नगरसेवक मोठा? असा सवाल उपस्थित करत शिवसेना (उद्धव बाळासाहेब ठाकरे) पक्षाचे तालुकाप्रमुख अमर कतारी यांनी यासंदर्भात गंभीर आरोप केले आहेत.
समाज माध्यमात व्हायरल झालेल्या या व्हिडिओच्या माध्यमातून कतारी यांनी म्हटले आहे की, काही दिवसांपूर्वी संगमनेरचे नगराध्यक्ष, सीओ साहेब, अतिक्रमण विभागाचे कर्मचारी, आमदार अमोल खताळ आणि आमदार सत्यजीत तांबे या सर्वमान्य नेत्यांना पत्र देऊन दिवाळीत लहान-मोठ्या व्यावसायिक व दुकानदारांना रहदारीस कोणताही अडथळा न येता १० ते १५ दिवसांसाठी दुकान लावण्याची परवानगी देण्याबाबत विनंती करण्यात आली होती.
या सर्व मागण्यांना काही अटींवर प्रशासनाने सकारात्मक प्रतिसाद दिला होता आणि रहदारीला कोणतीही अडचण येणार नाही याची काळजी घेत दुकान लावण्यासाठी मदत करण्याचे आश्वासन दिले होते. परंतु, याच दरम्यान एक काळXX नगरसेवक या ठिकाणी येऊन दुकानदारांना शेवटच्या दिवशी दुकान लावण्यास सांगून मनमानी करत असल्याचा संतापजनक प्रकार समोर आला आहे.
हाच नगरसेवक स्वतःच्या प्रभागात किंवा इतर टपऱ्यांवर पानटपरी, पिझ्झा, बर्गर आणि फळांची दुकाने थाटणाऱ्या प्रत्येक जणांकडून २०० ते ५०० रुपये गोळा करत असल्याची चर्चा आहे. संगमनेर नगरपालिका प्रशासनाने ज्या जागांवर आरक्षण टाकले आहे, त्याठिकाणी हा नगरसेवक पैसे घेऊन अतिक्रमण करण्यास मुभा देतो, असा गंभीर आरोप अमर कतारी यांनी केला आहे.
गरीब लोक पैसे देऊ शकत नाहीत किंवा त्यांच्याकडून अपेक्षेप्रमाणे वसुली पूर्ण होत नाही, तेव्हा हा नगरसेवक गरीब दुकानदारांना नडण्याचे काम करत असल्याचा आरोप करण्यात आला आहे. या नगरसेवकाने स्वतःच्या जमिनीवरचे आरक्षण कसे हटवून घेतले, समाजबांधवांच्या जमिनी कशा लुटल्या आणि त्याच जमिनींवर आरक्षण कसे टाकून नंतर त्या कशा स्वस्तात विकत घेतल्या, या सगळ्याचा खोलवर तपास केला तर मोठा भ्रष्टाचार समोर येईल, असा इशाराही यावेळी देण्यात आला.
या व्हिडिओच्या माध्यमातून त्या काळXX नगरसेवकाला स्पष्ट शब्दांत अमर कतारी यांच्याकडून इशारा देण्यात आला आहे की, शिवसैनिकांच्या आणि गरिबांच्या नादी लागल्यास तुला महागात पडेल. दरम्यान कतारी यांच्या आरोपानंतर संबंधित नगरसेवक कोण याची चर्चा शहरात सुरू झाली आहे.