बुधवार, २१ ऑगस्ट
गृह विभागाने राज्यातील ८२ पोलीस निरीक्षकांच्या बढतीचे आदेश काढले आहे. या आदेशानुसार अहमदनगरच्या आर्थिक गुन्हे शाखेला स्वतंत्र पोलीस उपाधीक्षक मिळाले आहे. तर गेल्या आठवड्यातच संगमनेर शहर पोलीस ठाण्याचा पदभार स्वीकारलेल्या पोलीस निरीक्षक बापूसाहेब महाजन यांची देखील बढतीवर नाशिक पोलीस अकादमीत पोलीस उपअधीक्षक म्हणून बदली झाली आहे.
संगमनेर शहर पोलीस ठाण्यात महाजन यांच्या रिक्त झालेल्या जागी आता पोलीस अधीक्षक आता कोणत्या पोलीस निरीक्षकाला संधी देतात, याकडे लक्ष लागले आहे. आगामी सण, उत्सव आणि होऊ घातलेल्या विधानसभा निवडणुका लक्षात घेता संगमनेर शहर पोलीस ठाण्याला नवे पोलीस निरीक्षक मिळतात की महाजन यांच्याकडेच संगमनेर शहर पोलीस ठाण्याचा तात्पुरता पदभार राहतो हे देखील लवकरच समोर येणार आहे.
पोलीस उपअधीक्षक, सहाय्यक पोलीस आयुक्त पदावर पदोन्नती झालेल्या राज्यातील ८२ अधिकाऱ्यांना नव्या पदस्थापना देण्यात आल्या आहे.
गेल्या आठवड्यात संगमनेर शहर पोलीस ठाण्यात पोलीस निरीक्षक म्हणून बदली झालेल्या बापूसाहेब महाजन यांना पोलीस उपअधीक्षक पदावर बढती मिळाली आहे. त्यांची नाशिकच्या पोलीस अकादमीत पोलीस उप अधीक्षक पदावर नियुक्ती करण्यात आली आहे.
गेल्या काही दिवसांपासून अहमदनगरमधील मोठ्या आर्थिक घोटाळ्यांचा तपास करणाऱ्या प्रभारी पोलीस उपाधीक्षक अमोल भारती यांच्या जागेवर नव्याने पोलीस उपाधीक्षक म्हणून गणेश रंगनाथ उगले यांची नियुक्ती करण्यात आली आहे. उगले यांच्या नियुक्तीमुळे आर्थिक गुन्हे शाखेला नवे स्वतंत्र पोलीस उपअधीक्षक मिळाले आहे.
न्यायाधिकरण, न्यायालय यांच्या आदेश, निवडणुकीची आचारसंहिता, कायदा व सुव्यवस्था इत्यादी बाबी लक्षात घेऊन पुढील कार्यवाही करण्याचे आदेश गृह विभागाने संबंधित अधिकाऱ्यांना दिले आहेत.
