अहमदनगर, २२ ऑगस्ट
महाराष्ट्रातील जास्तीत जास्त महिलांना लाडकी बहीण योजनेचा फायदा व्हावा हा सरकारचा हेतू आहे. लाडकी बहिण योजनेसंदर्भात जर बँकांनी तुमची अडवणूक केली तर बँकांवर कारवाई होऊ शकते, असा इशारा शिवसेना नेत्या व उपसभापती डॉ. नीलम गोऱ्हे यांनी बँकांना दिला.
मुख्यमंत्री लाडकी बहिण सन्मान योजेनेची मुख्यमंत्री एकनाथ शिंदे यांनी काही दिवसांपूर्वी घोषणा केली आहे. यानिमित्ताने अहमदनगरमध्ये मुख्यमंत्री लाडकी बहिण सन्मान यात्रेच्या कार्यक्रमाचे आयोजन करण्यात आले होते.
या कार्यक्रमाला शिवसेना नेत्या व उपसभापती डॉ. नीलम गोऱ्हे यांनी प्रमुख मार्गदर्शक म्हणून उपस्थिती लावली. माजी महापौर शीला शिंदे, संपर्कप्रमुख उज्वला भोपळे, जिल्हाप्रमुख डॉ. शबनम इनामदार, जिल्हाप्रमुख मीरा शिंदे, जिल्हाप्रमुख अनिल शिंदे, जिल्हाप्रमुख बाबूशेठ टायरवाले, तालुकाप्रमुख व पदाधिकारी उपस्थित होते.
याप्रसंगी शिवसेना नेत्या डॉ. नीलम गोऱ्हे यांचा अहमदनगर शिवसेनेच्यावतीने शाल, श्रीफळ व पुष्पगुच्छ देऊन सत्कार करण्यात आला.
डॉ. नीलम गोऱ्हे म्हणाल्या, सरकार तुम्हाला भीक देत नसून, तुमच्या कष्टातून हे राज्य उभ राहील आहे, याच कष्टाचा सन्मान करण्यासाठी तुम्हाला हे पैसे मिळत आहेत, ही भीक नसून हा तुमचा अधिकार आहे. तसेच महिलांनी त्यांच्या आरोग्याची काळजी घेतली पाहिजे, असा सल्ला देखील त्यांनी यावेळी महिलांना दिला.
या योजेनेचा प्रसार व्हावा म्हणून शिवसेना नेत्या व उपसभापती डॉ. नीलम गोऱ्हे यांच्या संकल्पनेतून माहितीचा रथ मुख्यमंत्री लाडकी बहिण सन्मान यात्रेसाठी तयार करण्यात आलेला आहे. या रथाच्या माध्यमातून अहमदनगरवासियांमध्ये जनजागृती करण्यात आली.
