शनिवार, ३१ ऑगस्ट
शुक्रवारी रात्री नऊ वाजण्याच्या सुमारास एका कार्यक्रमाच्या निमित्ताने संगमनेरमध्ये येत असलेल्या महसूल मंत्री राधाकृष्ण विखे पाटील यांच्या बंदोबस्तासाठीच्या ताफ्यातील पोलीस जीपला अपघात झाला. अपघातग्रस्त जीपने अन्य काही वाहनांना धडक दिल्याने या वाहनांचेदेखील नुकसान झाले तर अपघातात संगमनेर शहर पोलीस ठाण्यातील सहाय्यक महिला पोलीस निरीक्षक सोनल फडोळ यांच्यासह पोलीस कॉन्स्टेबल विजय आगलावे जखमी झाले आहे.
अपघातातील जखमींवर संगमनेरच्या खाजगी रुग्णालयात उपचार सुरू आहे. दरम्यान महसूल तथा पालकमंत्री राधाकृष्ण विखे पाटील यांनी देखील रुग्णालयात जाऊन जखमींची विचारपूस केली.
यावेळी संगमनेरचे पोलीस उपअधीक्षक सोमनाथ वाघचौरे, तहसीलदार धीरज मांजरे, शहर पोलीस ठाण्याचे पोलीस निरीक्षक बापूसाहेब महाजन उपस्थित होते.
महसूल मंत्री राधाकृष्ण विखे पाटील शुक्रवारी रात्री एका कार्यक्रमाच्या निमित्ताने संगमनेर मध्ये येत होते. शहरापासूनच काही अंतरावर रात्री नऊ वाजण्याच्या सुमारास कोल्हार- घोटी मार्गावर समनापुर येथील गणपती मंदिराजवळ हा अपघात झाला. घटनास्थळी अपघातग्रस्त वाहनातील लोक आणि पोलिसांमध्ये बराच वेळ वाद देखील सुरू होता. अपघातग्रस्त वाहनांचे मोठ्या प्रमाणात नुकसानदेखील झाले आहे.
दरम्यान या अपघाताचे वृत्त शहरात पसरताच घटनास्थळी मोठी गर्दी जमली होती. तसेच आपण आता संबंधीच्या विविध चर्चांना देखील पेव फुटले होते.
