अजित पवारांनी जनसन्मान यात्रेत केली विद्यमान आमदार किरण लहामटे यांची उमेदवारी जाहीर! अकोल्याचाही उमेदवार ठरला…

रविवार, ०६ ऑक्टोबर
उपमुख्यमंत्री अजित पवार यांनी रविवारी आपल्या पक्षाचा दुसरा उमेदवार जाहीर केला आहे. नगर जिल्ह्यातील अकोले विधानसभा मतदारसंघातून पवार यांनी विद्यमान आमदार डॉ. किरण लहामटे यांची पुन्हा उमेदवारी जाहीर केली आहे.
अजित पवार यांची जनसन्मान यात्रा रविवारी अकोला येथे पोहोचली होती. येथील सभेत बोलताना विधानसभा निवडणुकीत काही ठिकाणी घड्याळ, काही ठिकाणी धनुष्यबाण तर काही ठिकाणी भाजपच्या कमळाचे चिन्ह असेल, असे सांगत त्यांनी या मतदारसंघात घड्याळ चिन्ह असल्याचे स्पष्ट करत लहामटे यांच्या नावाची घोषणा करत त्यांना दुसऱ्यांदा संधी देण्यास सांगितले.
पवार म्हणाले, मागच्या पाच वर्षाच्या कालावधीत केवळ तीन वर्षे काम करायला मिळाले. या काळात तुमच्या बहाद्दर आमदाराने माझ्या मागे लागून अकोले मतदारसंघासाठी भरघोस निधी मिळविला. आधीचे दोन वर्षे मिळाले असते तर आणखी जास्त काम करता आले असते, तिजोरी चा आर्थिक भार पाहून मला काम करावे लागत असतात.
जनसन्मान यात्रेदरम्यान मी कोणावरही टीका करत नाही. सरकारच्या माध्यमातून केलेली विकास कामे जनतेला सांगत आहे. तुम्ही फक्त येथे घड्याळाचे बटन दाबा. त्यानंतर तुमच्या अडचणी दूर करण्याचे काम आमचे आहे. आम्ही एकदा बहुमताजवळ गेलो की सरकार आलेच. विरोधकांनी लोकसभेला खोटा प्रचार केला. त्याची किंमत आम्हाला मोजावी लागली. केवळ अर्धा टक्का मत कमी पडले पण जागा किती गेल्या याचा विचार करा, असे देखील ते म्हणाले.
लाडकी बहीण योजना जात बघून आणली का? असा सवाल करत या योजनेचा सगळ्यांना फायदा होतोय. मी तुम्हाला कधी अडचणीत येऊ दिले नाही, त्यामुळे माय माऊलींना तुमचे आशीर्वाद मला पाहिजेच. राखीची शपथ घेऊन सांगतो तुम्हाला वाऱ्यावर सोडणार नाही. तुम्ही फक्त सरकार आणा, आम्ही पुढील पाच वर्ष लाडकी बहीण योजना सुरू ठेवणार असून शेतकऱ्यांना मोफत वीज देणार असल्याचे देखील ते म्हणाले.