मंगळवार, १५ ऑक्टोंबर
सोमवारी झालेल्या राज्य मंत्रिमंडळाच्या बैठकीत महायुतीच्या राज्यपाल नियुक्त बारा सदस्यांपैकी सात सदस्यांची नावे निश्चित झाली असून मंगळवारी दुपारी बारा वाजता उपसभापती डॉ. नीलम गोऱ्हे नवनियुक्त आमदारांना सदस्यत्वाची शपथ देणार आहेत.
विधानसभा निवडणुकीची आचारसंहिता लागू होण्यास काही तास उरले असतानाच या सात जणांना आमदारकीची संधी मिळाली आहे. राज्यपाल नियुक्त सात सदस्यात महायुतीचा ३-२-२ असा फॉर्मुला वापरण्यात आला असून यात भारतीय जनता पक्षाच्या तीन, शिवसेना शिंदे गटाच्या दोन, आणि राष्ट्रवादी काँग्रेस अजित पवार गटाच्या दोन आमदारांचा समावेश आहे.
भारतीय जनता पक्षाकडून नियुक्त करण्यात आलेल्या तीन सदस्यांमध्ये श्रीमती चित्रा किशोर वाघ, विक्रांत पाटील व धर्मगुरू बाबुसिंग महाराज राठोड यांचा समावेश आहे. 
शिवसेना शिंदे गटाकडून हेमंत श्रीराम पाटील व डॉ. श्रीमती मनीषा कायंदे यांना संधी देण्यात आली आहे. तर राष्ट्रवादी काँग्रेस अजित पवार गटाकडून नांदगाव विधानसभा मतदारसंघाचे माजी आमदार पंकज भुजबळ आणि पश्चिम महाराष्ट्रातील राष्ट्रवादी काँग्रेसचा अल्पसंख्यांक विभागाचा चेहरा म्हणून इद्रिस नाईकवाडी यांना संधी देण्यात आली आहे.
विधानभवनाच्या मध्यवर्ती सभागृहात दुपारी बारा वाजता सातही विधान परिषद सदस्यांना उपसभापती डॉ. नीलम गोऱ्हे सदस्यत्वाची शपथ देणार असल्याची माहिती विधान भवनाकडून कळविण्यात आली आहे.
