मंगळवार १७ डिसेंबर
संगमनेर तालुक्यातील सावरगाव घुले गावाच्या जवळ असलेल्या बेलसोंडावाडीमध्ये मोलमजुरी करून उदरनिर्वाह करणाऱ्या महिलेच्या घराला लागलेल्या आगीमध्ये घरातील संसार उपयोगी सर्व वस्तू जळून खाक झाल्या आहेत. दरम्यान याची माहिती मिळताच माजी मंत्री बाळासाहेब थोरात यांच्या यशोधन संपर्क कार्यालयाकडून संबंधित महिलेला संसारोपयोगी वस्तूंची मदत करण्यात आली आहे.
सोमवारी रात्री दहा वाजण्याच्या सुमारास लाईट नसल्याने मंगल सिताराम घुले या महिलेने आपल्या घरात तेलाचा दिवा लावला होता. मोलमजुरी करून उदरनिर्वाह करणाऱ्या घुले एकट्याच घरात राहावयास आहे. घरात तेलाचा दिवा लावून घुले शेजारी गेल्या असताना तेलाचा दिवा अचानकपणे खाली पडल्याने संपूर्ण घराणे हळूहळू पेट घेतला. हा प्रकार लक्षात येईपर्यंत आग मोठ्या प्रमाणात भडकली होती.
आगीत जुने यांच्या घरातील चार पोते सोयाबीन, बाजरीचे पोते, कपडे याच्यासह संसार उपयोगी सर्व वस्तू जळून खाक झाल्या. मोलमजुरी करून मिळालेले पाच ते सात हजार रुपयांची रोख रक्कम देखील आगीत जळून गेली. घुले यांचा संपूर्ण संसार आगीच्या भक्षस्थानी पडला.
दरम्यान घटनेची माहिती मिळाल्यानंतर कामगार तलाठी गबाले यांनी घटनास्थळी भेट देऊन पंचनामा केला आहे. तर या प्रकाराची माहिती समजताच माजी मंत्री बाळासाहेब थोरात यांनी आपल्या संपर्क कार्यालयातील सहकाऱ्यांना संबंधित महिलेला संसार उपयोगी वस्तूची मदत करण्याचे आदेश दिले. थोरात यांच्या सहकाऱ्यांनी तातडीने घटनास्थळी बेलसोंडावाडी येथे जात मदत पोहोचविली.
महसूल विभागाने आगीत झालेल्या नुकसानीचा पंचनामा केला असून या महिलेला शासनाकडून मदत करण्यात यावी अशी मागणी सावरगाव घुले गावचे सरपंच नामदेव घुले, माजी सरपंच अर्जुन घुले, मधुकर घुले, पाराजी घुले, लहानु घुले आदी ग्रामस्थांनी केली आहे.
