अहिल्यानगर, दि. ०९ फेब्रुवारी
दूध डेअरीची १७ लाखाची रोकड बँकेत भरणा करण्यासाठी घेऊन जात असताना फिर्यादीला लुटणाऱ्या टोळीतील चौथा आरोपी तब्बल २ महिन्यानंतर जेरबंद करण्यात अहिल्या नगरच्या स्थानिक गुन्हे शाखेला यश आले आहे.
ऋषीकेश उर्फ पप्पु अनिल कुसळकर (वय २१, रा. राजलक्ष्मी निवास, बाळकृष्ण नगर, पेठ रोड, पंचवटी नाशिक) असे पोलिसांनी पकडलेल्या आरोपीचे नाव आहे. पकडलेल्या आरोपीला राहुरी पोलिसांच्या ताब्यात देण्यात आले असून पुढील तपास राहुरी पोलीस करत असल्याची माहिती देण्यात आली.
फिर्यादी अनिल मुरलीधर बनसोडे (वय ५१, रा. ब्राम्हणी, ता. राहुरी) हे दिनांक ३० जानेवारी २०२४ रोजी मुळा अँग्रो प्रोडक्ट लि. ब्राम्हणी, ता. राहुरी या कंपनीची १७ लाख रुपयांची रोख रक्कम बँकेमध्ये भरणा करण्यासाठी कारमधुन जात असताना अज्ञात चार आरोपीनी त्यांच्या कारला काळ्या रंगाची किया कार आडवी लावली.
कार मधील दोन आरोपीनी गज व टॉमीने फिर्यादी बनसोडे यांच्या ताब्यात असलेल्या फोर्ड कारच्या काचा फोडून, साक्षीदार यांना टॉमीने मारहाण करून त्यांचेजवळील रोख रक्कम असलेली बॅग जबरदस्तीने नेत पलायन केले होते.
याबाबत राहुरी पोलीस ठाण्यात गु.र.नं. १३१३/२०२४ बीएनएस कलम ३०९ (६) प्रमाणे जबरी चोरीचा गुन्हा दाखल करण्यात आला होता. त्यानंतर स्थानिक गुन्हे शाखेच्या तपास पथकाने सचिन राजेंद्र वायदंडे, शुभम मनोज गुळसकर व अभिषेक लक्ष्मण जाधव अशा तिघा संशयित आरोपीना मुद्देमालासह पकडत राहुरी पोलिसांच्या ताब्यात दिले होते. तर अन्य आरोपी गुन्हा केल्यापासुन फरार झालेले होते.
गुन्हे शाखेचे पोलीस निरीक्षक दिनेश आहेर यांच्या नेतृत्वाखाली असलेल्या तपास पथकातील पोलीस उपनिरीक्षक अनंत सालगुडे, पोलीस अंमलदार संदीप पवार, अमोल कोतकर, बाळासाहेब खेडकर, आकाश काळे, अमृत आढाव, फुरकान शेख, प्रशांत राठोड व उमाकांत गावडे यांनी तांत्रीक विश्लेषणाच्या आधारे आरोपी ऋषीकेश उर्फ पप्पु कुसळकर, रा. नाशिक हा पुणे येथे असल्याची माहिती मिळविली. त्यानंतर या पथकाने पुणे येथे जात आरोपीला पकडले.
आरोपी कुसळकर याच्याकडे गुन्हयाबाबत पथकाने विचारपूस केली असता त्याने सदरचा गुन्हा हा त्याचे साथीदार अमोल शिंदे (रा. नागापूर, एमआयडीसी, अहिल्यानगर), मोहन सुरेश लष्करे (रा. नेवासा, ता. नेवासा), प्रतिक जाधव (रा. ब्राम्हणी, ता. राहुरी), सचिन वायदंडे (रा. नागापूर, एमआयडीसी, अहिल्यानगर), शुभम गुळसकर (रा. बोल्हेगाव, एमआयडीसी, अहिल्यानगर) व अभिषेक जाधव, (रा. एमआयडीसी, नवनागापूर, अहिल्यानगर) अशांनी मिळून प्लॅन करून केला असल्याची कबुली दिली. तसेच आरोपींनी गुन्हयांत वापरलेली किया कार ही कृष्णा पुनमसिंग परदेशी (रा. नेवासा, ता. नेवासा, जि. अहिल्यानगर) याची असल्याचे सांगीतले.
