सोमवार, दि. १० फेब्रुवारी – प्रतिनिधी
या-ना त्या कारणाने सातत्याने चर्चेत असलेल्या घारगाव पोलीस ठाण्याच्या हद्दीत नासिक-पुणे मार्गावर लुटमारीचा नवा प्रकार समोर आला आहे. ट्रक चालकाला पिस्तुलाचा धाक दाखवत शेतीसाठी असलेल्या औषधांचे ५ लाख १२ हजार २१४ रुपयांचे १८१ बॉक्स आणि बॅग ट्रकमधून अज्ञात दोघे अनोळखी व्यक्तींनी पळविले आहेत.
संगमनेर तालुक्यातील पठार भागातील माहुली घाटामध्ये गेल्या आठवड्यात ही घटना घडली असून ट्रक चालकाच्या तोंडाला रुमाल लावून त्याला बेशुद्ध करून पिस्तूलचा वापर करीत लुटमार केल्याची घटना घडली. घारगाव पोलीस ठाण्याच्या हद्दीलगत पुणे जिल्ह्याचे सीमा असल्याने अहिल्यानगर पुणे जिल्ह्यातील गुन्हेगारांचे या परिसरात मोठी वर्दळ असते. गुन्हेगारांवर पोलिसांचा धाक राहिला नसल्याचे या प्रकरणामुळे उघड होत आहे.
याबाबतची माहिती अशी की, सिद्धिविनायक लॉजिस्टिक कंपनीचा शेती औषधांचा माल घेऊन फुरसुंगी, पुणे येथून लेलँड कंपनीचा ट्रक (एमएच ४२ ए क्यू ८०७८) हा नाशिककडे चालला होता. चाळकवाडीच्या पुढे रात्री दोन वाजण्याच्या सुमारास दोन अज्ञात तरुण इसम हात दाखवून ट्रकमध्ये बसले. या दोन अज्ञात इसमांचे नाव पत्ता सदर ट्रक चालकाला माहित नाही.
त्या दोघांनी संगमनेरला जायचे आहे असे सांगितले होते. त्यानंतर हे सर्व त्या ट्रकमधून संगमनेरकडे निघाले असता पहाटे चार वाजण्याच्या सुमारास माहुली घाटामध्ये त्यातील एकाने बाथरूमला जायचे असल्याचे सांगून गाडी थांबवली व तो खाली उतरला. त्यानंतर गाडीत बसलेल्या दुसऱ्याने चालकाच्या कमरेला पिस्तूल लावले व खाली उतरलेल्या इसमाने दरवाजाच्या बाजूने येऊन पांढऱ्या रंगाचा रुमाल नाकाला लावल्यानंतर चालक बेशुद्ध पडला.
तो त्यांनी त्याला ट्रकच्या हौदामध्ये सोडून दिले. सकाळी साडेसात वाजण्याच्या सुमारास सदर ट्रक चालक शुद्धीवर आल्यानंतर त्या ट्रकमधील शेतीमालाचे औषध बॅग्स, बॉक्स गायब झालेले त्यास आढळून आले. या ट्रकमध्ये सिद्धिविनायक लॉजिस्टिक कंपनीचे शेतीमालाचे औषधाचे ५ लाख ७२ हजार २१४ रुपयांचे १८१ बॉक्स होते.
या संदर्भात ट्रकचालक दीपक किसन कदम (वय ४२ वर्ष, रा. राजगुरुनगर, ता. खेड, जि. पुणे) यांनी फिर्याद दिली असून पोलिसांनी दोन अज्ञात व्यक्तींविरुद्ध गुन्हा दाखल केला असून पोलीस पुढील तपास करत आहे.
