सोमवार, दि. १० फेब्रुवारी –
घरकुलाच्या बांधकामासाठी आवश्यक असलेल्या विटा बनविण्याकरिता गावानजीकच्या नाल्यातून माती उत्खनन करणाऱ्या तक्रारदाराच्या नातेवाईकाचा ट्रॅक्टर, मजूर आणि तक्रारदारावर वनविभागाच्या वनपालाने गुन्हा दाखल करण्याचा धाक दाखवत मातीसाठी वापरण्यात येणारा ट्रॅक्टर घेऊन गेला. प्रकरण मिटविण्यासाठी व कारवाई न करण्यासाठी तक्रारदाराकडे एक लाख दहा हजार रुपयांची लाच मागितल्या प्रकरणी तसेच लाचलुचपतच्या कारवाई दरम्यान प्रकरण मिटविण्यासाठी दुसऱ्या वनरक्षकाने ३५ हजार रुपयांची मागणी केल्याप्रकरणी तिघांवर लाच लुचपत विभागाने कारवाई केली आहे.
वनपरिक्षेत्र अधिकारी ममता नामदेव राठोड, वनपाल मारुती संभाजी गायकवाड आणि वनरक्षक गणेश उत्तम राठोड अशी कारवाई करण्यात आलेल्या तिघा लोकसेवक आरोपींची नावे आहे. एकाच वेळी लाच लुचपत विभागाच्या अधिकाऱ्यांनी दुर्गम भागात गडचिरोलीमध्ये या दोन कारवाया केल्या.
नागपूर परिक्षेत्राचे पोलीस अधीक्षक दिगंबर प्रधान, अपर पोलीस अधीक्षक सचिन कदम संजय पुरंदरे यांच्या मार्गदर्शनाखाली गडचिरोली लाच लुचपतचे पोलीस उपाधीक्षक चंद्रशेखर ढोले, पोलीस निरीक्षक शिवाजी राठोड, संतोष पाटील, सहाय्यक फौजदार सुनील पेद्दीवार, हवालदार शंकर डांगे, किशोर जंजाळकर, हितेश पद्मगीरवार, स्वप्निल वांबोळे, पोलिस अंमलदार संदीप घोरपडे, संदीप उडान, प्रवीण जुमनाके आदींनी ही कारवाई केली.
राज्य शासनाकडून तक्रारदाराला घरकुल मंजूर झाले आहे. या घरकुलाच्या बांधकामासाठी विटा बनवण्याकरता आवश्यक असलेली माती तक्रारदाराने गावानजीकच्या नाल्यातून आपल्या नातेवाईकांच्या मदतीने ट्रॅक्टरमध्ये भरत असताना तेथे आलेल्या वनपाल मारुती गायकवाड यांनी तक्रारदार वनविभागाच्या जागेतून अवैधपणे माती उत्खनन करत असल्याचे सांगून कारवाई करण्याची भीती दाखविली. तसेच कारवाई न करण्यासाठी एक लाख दहा हजार रुपयांची लाच मागितली.
त्यामुळे तक्रारदाराने गडचिरोलीच्या लाच लुचपत विभागाकडे तक्रार केली होती. लाच लुचपतचे अधिकारी या तक्रारीची पडताळणी करण्यासाठी जात असताना वनरक्षक गणेश उत्तम राठोड याने तक्रारदाराला भेटून सौम्य दंडात्मक कारवाई करून प्रकरण मिटविण्यासाठी ३५ हजार रुपयांची मागणी केली. त्यानंतर तक्रारदाराने गायकवाड यांची भेट घेतली असता राठोड याने वनपरिक्षेत्र अधिकारी ममता राठोड यांच्या समक्ष लाचेची मागणी केली. तक्रारदाराने एवढी मोठी रक्कम देण्यास असमर्थता दर्शविल्याने ममता राठोड घेणे तक्रारदारास गुन्हा नोंद करून तुरुंगवासाची कारवाई होईल अशी भीती घालून लाच देण्यास प्रोत्साहित केले.
ममता राठोड यांच्या दालनातून बाहेर आल्यावर वनपाल गायकवाड यांनी तक्रारदाराकडे तडजोडीअंती १ लाखाची मागणी केली. त्यानंतर त्यानंतर ममता राठोड यांच्या दालनात गायकवाड यांनी तक्रारदाराकडून एक लाख रुपये स्वीकारले. पैसे घेतल्यानंतर तक्रारदाराला सतरा हजार रुपयांची दंडात्मक पावती देण्यात आली तर उर्वरित रक्कम लाच म्हणून स्वीकारण्यात आल्याने लाच लुचपत विभागाने तिघांवर कारवाई केली आहे.
वनविभागाच्या तिघांविरोधात गडचिरोलीच्या अहेरी पोलीस ठाण्यात गुन्हा दाखल करण्यात आला असून तीनही लोकसेवक आरोपींना अटक करण्यात आली आहे.
