पत्नीच्या आत्महत्या प्रकरणी नामांकित डॉक्टरसह सासू-सासऱ्याविरोधात गुन्हा

सोमवार दि. १० फेब्रुवारी –
वैद्यकीय व्यवसाय करणाऱ्या नामांकित डॉक्टरच्या पत्नीने राहत्या घरात आतून दरवाजा लावून घेत छताच्या हुकाला साडीने गळफास घेऊन आत्महत्या केल्याचा प्रकार शुक्रवारी अहिल्यानगर जिल्ह्यातील शेवगावमध्ये घडला होता.

आता या प्रकरणी पोलिसांनी डॉ. सुशील कबाडी यांच्या विरोधात पत्नीला आत्महत्येस प्रवृत्त केल्याचा गुन्हा पोलीस ठाण्यात दाखल केला आहे. यामुळे वैद्यकीय व्यावसायिकांमध्ये खळबळ उडाली आहे.
सायली सुशील कबाडी (वय ३३, रा. सिद्धिविनायक कॉलनी, शेवगाव) असे आत्महत्या केलेल्या डॉक्टर पत्नीचे नाव आहे. यासंदर्भात सायली कबाडी यांचे वडील चंद्रकांत हरिश्चंद्र परब यांनी शेवगाव पोलीस ठाण्यात दिलेल्या तक्रारीवरून डॉ. सुशील जगन्नाथ कबाडी, सासरा व सासू यांच्या विरोधात गुन्हा दाखल करण्यात आला आहे.
चंद्रकांत परब यांनी दिलेल्या फिर्यादीत म्हटले आहे की सायली व डॉ. सुशील यांचा विवाह १४ डिसेंबर २०१६ रोजी झाला होता. सुरुवातीचे दोन वर्ष सायली हिला चांगले नांदविल्यानंतर तुला जेवण करता येत नाही, तुझ्या वडिलांनी हुंडा दिला नाही, माहेराहून दहा लाख रुपये घेऊन ये अशी वारंवार मागणी करत सायली हिचा सासरच्या मंडळी कडून तिचा छळ केला जात होता.
तिला मारहाण, शिवीगाळ, दमदाटी याबरोबरच शारीरिक, मानसिक छळ करत क्रूर वागणूक दिली असल्याचे तक्रारीत म्हटले आहे.

पंचनामा करणाऱ्या पोलीस अंमलदाराला संशय…
दरम्यान सायली यांनी आत्महत्या केल्याचे समजताच डॉ. सुशील याने घरातील सदस्यांच्या मदतीने दरवाजा तोडला होता. त्यानंतर सायलीने राहत्या घराच्या खोलीचे दार आतून लावून छताच्या हुकाला साडीच्या साह्याने गळफास घेतल्याची माहिती पोलिसांना दिली होती. माहिती मिळताच पोलीस कर्मचारी अरविंद चव्हाण पंचनामा करण्यासाठी घटनास्थळी गेले असता त्यांना ही घटना संशयास्पद वाटली. त्यामुळे त्यांनी शेवगाव ग्रामीण रुग्णालयात मृत महिलेचे शवविच्छेदन न करता मृतदेह अहिल्यानगर येथे वैद्यकीय तपासणीसाठी पाठविला होता. शवविच्छेदन अहवालामध्ये मृत महिलेच्या शरीरावर मारहाणीच्या खुणा आढळून आल्या. त्यामुळे पोलिसांनी कबाडी यांच्याविरुद्ध पत्नी सायली हिला आत्महत्येस प्रवृत्त केल्याप्रकरणी गुन्हा दाखल केला असून पुढील तपास सहाय्यक पोलीस निरीक्षक अशोक काटे यांच्याकडे सोपविण्यात आला आहे.