विशेष प्रतिनिधी / मुंबई
राज्याच्या मुख्यमंत्री पदासाठी शिवसेनेने यापूर्वी केलेली मागणी विरळत नाही तोच आता अजित पवारांच्या राष्ट्रवादीने आगामी मुख्यमंत्री हे अजित पवार असतील असं सांगायला सुरुवात केल्याने महायुतीतील भाजपमध्ये पुन्हा एकदा चलबिचल सुरु झाली आहे.
राष्ट्रवादी कॉंग्रेसचे नेते, मंत्री बाबासाहेब पाटील यांनी मुख्यमंत्री पदासंदर्भात केलेल्या वक्तव्यामुळे सध्या राजकीय वर्तुळात चर्चांना उधाण आलंय. “येत्या काळात अजित पवार राज्याचे मुख्यमंत्री होतील,” असा दावा त्यांनी केला.
पक्षप्रमुख अजित पवार यांच्यात मुख्यमंत्री होण्याची क्षमता असून भविष्यात तेच महाराष्ट्राचे मुख्यमंत्री होतील,” असं मत बाबासाहेब पाटील यांनी प्रसार माध्यमांशी संवाद साधताना व्यक्त केलं. पुढं ते म्हणाले, “मुख्यमंत्री देवेंद्र फडणवीस हे देखील चांगलं काम करतायत. परंतु, भविष्यात निवडणुकीनंतर अजित पवार मुख्यमंत्री व्हावेत, हे फक्त माझं वैयक्तिक मत आहे. माझा कोणालाही विरोध करत नाही,” असंही त्यांनी स्पष्ट केलं.
सध्या महाराष्ट्रात महायुतीचं सरकार आहे. ज्यामध्ये भाजपा, शिवसेना आणि राष्ट्रवादी काँग्रेस यांचा समावेश आहे. महाराष्ट्र विधानसभा निवडणुकीत भाजपानं १३२, शिवसेनेनं ५७ तर राष्ट्रवादीनं ४१ जागा जिंकल्या होत्या. दरम्यान, शिवसेनेने मुख्यमंत्री पदासाठी एकनाथ शिंदे यांचं नाव घेत देवेंद्र फडणवीस यांना अंगावर घेतलं आहे. हे थांबत नाही तोच आता अजित पवारांसाठी काहींनी युतीच्या धर्माची चर्चा सुरु केल्याने आश्चर्य व्यक्त होत आहे.
