मुंबई, दि. १८ मार्च: प्रतिनिधी
विधान परिषदेच्या पोटनिवडणुकीत मोठी घडामोड घडली आहे. अर्ज छाननी दरम्यान एका अपक्ष उमेदवाराचा अर्ज बाद झाल्यामुळे निवडणूक बिनविरोध झाली आहे. बिनविरोध झालेल्या उमेदवारांच्या निवडीची औपचारिकता बाकी आहे.
या निवडणुकीत भाजपचे तीन, शिंदे गटाच्या शिवसेनेचा एक आणि अजित पवार गटाच्या राष्ट्रवादी काँग्रेसच्या एका उमेदवाराचा विजय झाला आहे.
विजयी उमेदवार –
* दादाराव केचे (भाजप)
* संजय केणेकर (भाजप)
* संदीप जोशी (भाजप)
* चंद्रकांत रघुवंशी (शिंदे गट शिवसेना)
* संजय खोडके (अजित पवार गट राष्ट्रवादी काँग्रेस)
महायुतीच्या या पाच उमेदवारा व्यतिरिक्त आणखी एका अपक्ष उमेदवाराने उमेदवारी अर्ज दाखल केला होता. अपक्ष उमेदवाराने सादर केलेल्या अर्जात आवश्यक कागदपत्रांची पूर्तता केलेली नव्हती. आमदारांच्या पाठिंब्याचे पत्र आणि नोटरी नसल्यामुळे त्यांचा अर्ज अपात्र ठरवण्यात आला.
उमेदवारी अर्ज भरण्याचा सोमवारचा अखेरचा दिवस होता. अखेरच्या दिवसाखेर सहा उमेदवारांच्या अर्ज दाखल झाले होते. यातील अपक्ष उमेदवाराचा अर्ज बाद झाला. तर २० मार्चपर्यंत उमेदवारी अर्ज मागे घेण्याची मुदत आहे. त्यानंतर निवडणूक अधिकारी बिनविरोध निवडून आलेल्या आमदारांच्या नावाची अधिकृत घोषणा करतील.
भाजपने संदीप जोशी, दादाराव केचे आणि संजय केणेकर यांची उमेदवारी जाहीर केली होती. शिंदे गटाच्या शिवसेनेने चंद्रकांत रघुवंशी आणि अजित पवार गटाच्या राष्ट्रवादी काँग्रेसने संजय खोडके यांच्या नावाची घोषणा केली होती. संजय खोडके हे आमदार सुलभा खोडके यांचे पती आहेत.
