मुंबई दि. १८ मार्च : प्रतिनिधी
राज्य सरकारने सनदी अधिकाऱ्यांच्या बदल्यांचा धडाका सुरूच ठेवला आहे. गेल्या काही दिवसांपासून दर ८ ते १५ दिवसांनी वरिष्ठ अधिकाऱ्यांच्या बदल्यांची घोषणा होत आहे. यापूर्वी १५ दिवसांपूर्वी काही जिल्हाधिकारी आणि महापालिका आयुक्तांच्या बदल्या झाल्या होत्या. आता पुन्हा एकदा सहा आयएएस अधिकाऱ्यांच्या बदल्या जाहीर करण्यात आल्या आहेत.
यामध्ये नागपूरच्या अतिरिक्त महापालिका आयुक्त आंचल गोयल यांना मुंबईच्या जिल्हाधिकारीपदी नियुक्त करण्यात आले आहे, तर छत्रपती संभाजीनगरसह इतर जिल्ह्यांमध्येही अधिकाऱ्यांच्या जबाबदाऱ्यांमध्ये बदल करण्यात आले आहेत.
नागपूरमध्ये नुकत्याच झालेल्या दोन गटांमधील तणावामुळे शहर चर्चेत आले होते. सध्या तिथली परिस्थिती नियंत्रणात असली तरी आता अतिरिक्त महापालिका आयुक्तांची बदली झाल्याने याबाबत चर्चा सुरू आहे. याशिवाय जळगाव, नांदेड, पालघर आणि गडचिरोली येथील अधिकाऱ्यांच्या बदल्याही जाहीर झाल्या आहेत.
जळगाव जिल्हा परिषदेचे मुख्य कार्यकारी अधिकारी अंकित यांची छत्रपती संभाजीनगर येथे मुख्य कार्यकारी अधिकारी म्हणून बदली झाली आहे. तसेच, मुख्यमंत्री देवेंद्र फडणवीस पालकमंत्री असलेल्या गडचिरोली जिल्ह्यातही आयएएस अधिकारी रणजित मोहन यादव यांना नवीन पदभार देण्यात आला आहे.
बदली झालेल्या अधिकाऱ्यांची यादी आणि नवीन नियुक्ती ठिकाणे…
* आंचल गोयल (IAS:RR:2014) – अतिरिक्त महानगरपालिका आयुक्त, नागपूर यांची मुंबई शहराच्या जिल्हाधिकारीपदी नियुक्ती.
* अंकित (IAS:RR:2019) – मुख्य कार्यकारी अधिकारी, जिल्हा परिषद, जळगाव यांची छत्रपती संभाजीनगर येथे मुख्य कार्यकारी अधिकारी म्हणून नियुक्ती.
* मीनल करनवाल (IAS:RR:2019) – मुख्य कार्यकारी अधिकारी, जिल्हा परिषद, नांदेड यांची जळगाव जिल्हा परिषदेच्या मुख्य कार्यकारी अधिकारीपदी नियुक्ती.
* कवली मेघना (IAS:RR:2019) – प्रकल्प संचालक, ITDP, किनवट आणि सहाय्यक जिल्हाधिकारी, किनवट उपविभाग, नांदेड यांची नांदेड जिल्हा परिषदेच्या मुख्य कार्यकारी अधिकारीपदी नियुक्ती.
* करिश्मा नायर (IAS:RR:2021) – प्रकल्प संचालक, ITDP, जव्हार आणि सहाय्यक जिल्हाधिकारी, जव्हार उपविभाग, पालघर यांची नाशिक महानगरपालिकेच्या अतिरिक्त महानगरपालिका आयुक्तपदी नियुक्ती.
* रणजित मोहन यादव (IAS:RR:2022) – सहाय्यक जिल्हाधिकारी, कुरखेडा उपविभाग, गडचिरोली यांची प्रकल्प अधिकारी, ITDP, गडचिरोली आणि सहाय्यक जिल्हाधिकारी, गडचिरोली म्हणून नियुक्ती.
