स्वातंत्र्यदिनी भंडारदरा, कळसूबाई फिरण्याचा प्लॅन आहे? आधी पोलिसांचे ‘हे’ नवीन वाहतूक नियम नक्की वाचा!

महाराष्ट्र संवाद न्यूज ऑनलाईन 

अहिल्यानगर:

अहिल्यानगर पोलीस प्रशासनाने १५ आणि १६ ऑगस्ट रोजी अकोले तालुक्यातील भंडारदरा व परिसरातील पर्यटन स्थळांवर होणारी प्रचंड गर्दी आणि वाहतूक कोंडी टाळण्यासाठी रंधा फाटा ते भंडारदरा मार्गावरील वाहतुकीत मोठे बदल केले आहेत. 

स्वातंत्र्यदिन आणि त्याला जोडून आलेल्या शनिवार व रविवारी पुणे, मुंबई, नाशिक, ठाणे आणि अहिल्यानगर येथून मोठ्या संख्येने पर्यटक भंडारदरा, रंधा धबधबा, कळसूबाई शिखर, हरिश्चंद्रगड व कोकण कडा परिसरात येण्याची शक्यता आहे. या परिसरातील रस्ते अरुंद असून काही ठिकाणी दुरुस्तीचे काम सुरू असल्याने वाहतूक कोंडी होऊन कायदा व सुव्यवस्थेचा प्रश्न निर्माण होऊ नये, यासाठी अहिल्यानगरचे पोलीस अधीक्षक मुम्मका सुदर्शन यांनी महाराष्ट्र पोलीस अधिनियम १९५१ च्या कलम ३३ (१) (ब) नुसार हे वाहतूक नियमनाचे आदेश जारी केले आहेत.

नवीन नियमांनुसार रंधा फाटा येथून भंडारदरा कडे जाणाऱ्या सर्व वाहनांसाठी प्रवेश बंद करण्यात आला आहे. शेंडी व भंडारदरा येथे जाण्यासाठी पर्यटकांना वाकी फाटा व वारंगुशी फाटा येथून प्रवेश दिला जाईल. याशिवाय पर्यटकांच्या प्रवासासाठी एकेरी वाहतूक मार्ग निश्चित करण्यात आला असून वाहने वारंगुशी फाटा किंवा वाकी फाटा येथून प्रवेश करून चिंचोंडी फाटा, यश रिसॉर्ट, शेंडी, भंडारदरा धरण स्पिलवे गेट, भंडारदरा गाव, गुहिरे मार्गे रंधा या रस्त्याने पुढे जातील.

हे वाहतुकीतील बदल १५ ऑगस्ट आणि १६ ऑगस्ट २०२६ रोजी सकाळी ७:०० ते रात्री ८:०० वाजेपर्यंत राजूर पोलीस ठाण्याच्या हद्दीत लागू राहतील. शासकीय वाहने, रुग्णवाहिका, अग्निशामक दल आणि स्थानिक प्रशासनाने अत्यावश्यक कारणास्तव परवानगी दिलेल्या वाहनांना या प्रवेशबंदीतून सूट देण्यात आली आहे.