५० लाखांची कथित खंडणी अन् प्रशासकीय अनागोंदी: मुख्याधिकारी सक्तीच्या रजेवर, जिल्हाधिकाऱ्यांची कठोर कारवाई; नायब तहसीलदार मोहसीन शेख यांच्याकडे अतिरिक्त पदभार

महाराष्ट्र संवाद न्यूज ऑनलाईन –

गेल्या काही महिन्यांपासून सुरू असलेल्या तक्रारी आणि प्रशासकीय वादाची गंभीर दखल घेत अहिल्यानगरचे जिल्हाधिकारी डॉ. पंकज आशिया यांनी कर्जत नगरपंचायतीचे मुख्याधिकारी अक्षय जायभाये यांना सक्तीच्या रजेवर पाठवले आहे. २५ सप्टेंबर २०२६ पासून पुढील कायदेशीर कारवाई निश्चित होईपर्यंत जायभाये यांना रजेवर पाठविण्याचा आदेश २३ सप्टेंबर रोजी डिजिटल स्वाक्षरीने काढण्यात आला. जायभाये यांच्याविरुद्ध प्राप्त तक्रारी, मागवण्यात आलेले खुलासे आणि त्यानंतरही समाधानकारक खुलासा न आल्याने ही कारवाई करण्यात आल्याचे जिल्हाधिकाऱ्यांच्या आदेशात नमूद करण्यात आले आहे.

आष्टी मतदारसंघाचे आमदार सुरेश धस यांनी ८ डिसेंबर २०२५ रोजी नगरविकास विभागाकडे केलेल्या तक्रारीचा या आदेशात स्पष्ट संदर्भ आहे. कृष्णा मराठवाडा सिंचन प्रकल्पांतर्गत आष्टी उपसा सिंचन योजना क्रमांक ३ च्या जलवाहिनीच्या कामात अडथळे निर्माण करणे, जलसंपदा व कृषी विभाग तसेच ठेकेदाराला दूरध्वनीवरून काम बंद करण्याच्या धमक्या देणे आणि संबंधित ठेकेदाराकडून ५० लाख रुपयांची खंडणी मागितल्याचा आरोप या तक्रारीत होता. याप्रकरणी ६ जुलै २०२६ रोजी मागविलेला खुलासा समाधानकारक नसल्याचे स्पष्ट करण्यात आले आहे.

तसेच महसूल मंत्र्यांकडे प्राप्त तक्रारीत दिवंगत नेते अजितदादा पवार यांच्या फ्लेक्सची विटंबना, वसुली विभागातील अनियमितता, अतिक्रमण प्रकरणांतील आर्थिक गैरव्यवहार आणि बांधकाम विभागातील अनागोंदीचे गंभीर आरोप करण्यात आले होते. यावर २ जून रोजी मागवलेला खुलासा जायभाये यांनी ३ जून रोजी सादर केला होता, मात्र तो मोघम आणि वस्तुस्थितीला धरून नसल्याचे सांगत जिल्हाधिकाऱ्यांनी अमान्य केला.

शासकीय कर्तव्यात कसूर आणि हलगर्जीपणाबाबत जायभाये यांची पुढील एक व दोन वार्षिक वेतनवाढ का रोखण्यात येऊ नये, अशा कारणे दाखवा नोटीसही देण्यात आल्या होत्या. सविस्तर खुलासा करण्यासाठी दिलेली सात दिवसांची मुदत उलटूनही त्यांनी कोणताही लेखी खुलासा सादर केला नाही. जायभाये हे जाणीवपूर्वक प्रशासकीय आदेशांचे उल्लंघन करत असून शासकीय प्रक्रियेला सहकार्य करत नसल्याचे सिद्ध झाले आहे. ते परिविक्षाधीन मुख्याधिकारी असल्याने त्यांचा परिविक्षाधीन कालावधी वाढवण्याची शिफारस विचाराधीन असल्याचेही आदेशात म्हटले आहे.

दरम्यान, जायभाये यांना सक्तीच्या रजेवर पाठवल्यानंतर कर्जत नगरपंचायतीच्या मुख्याधिकारी पदाचा अतिरिक्त कार्यभार कर्जत तहसील कार्यालयाचे नायब तहसीलदार (संगांयो) मोहसीन शेख यांच्याकडे सोपवण्यात आला आहे. या आदेशाच्या प्रती नगरविकास विभागाचे अपर मुख्य सचिव, नगरपरिषद प्रशासन संचालक, महसूल मंत्र्यांचे खासगी सचिव, आमदार सुरेश धस आणि नाशिकच्या विभागीय आयुक्तांना पाठवण्यात आल्या आहेत.