फटाक्याचे पैसे देण्याच्या कारणावरून खून आणि जीवे मारण्याचा प्रयत्न; शहर पोलिसांची धडक कारवाई, दोन आरोपी अटकेत

महाराष्ट्र संवाद न्यूज ऑनलाईन-
श्रीरामपूरच्या टिळकनगर भागातील कामगार चौक परिसरात फटाक्याचे पैसे मागण्याच्या वादातून एकावर प्राणघातक हल्ला करून खून केल्याची खळबळजनक घटना उघडकीस आली आहे. याप्रकरणी श्रीरामपूर शहर पोलीस ठाण्यात गुन्हा दाखल करण्यात आला असून, पोलिसांनी तत्परता दाखवत दोन मुख्य आरोपींना जेरबंद केले आहे.
रविवारी (८ नोव्हेंबर २०२६) रात्री साडेदहा वाजण्याच्या सुमारास फिर्यादी मोईनुद्दीन शकील पठाण हे त्यांच्या कामगार चौक, टिळकनगर येथील फटाक्याच्या दुकानात असताना आरोपी सागर राहुल गुंजेकर, अक्षय राहुल गुंजेकर, आनंद अमर पवार, अमित रविकांत पटारे, उमर शेख (सर्व रा. श्रीरामपूर परिसर) यांच्यासह इतर आरोपी दुकानावर आले. आरोपींनी फिर्यादीकडे फटाक्याच्या पैशांची मागणी केली.
फिर्यादीने पैसे देण्यास नकार दिल्यावर आरोपींनी दमदाटी करत जीवे मारण्याची धमकी दिली. त्यानंतर काहीवेळाने हे आरोपी पुन्हा अमित रावसाहेब कोळगे, मनोज रावण साळवे, सिद्धार्थ या साथीदारांसमवेत स्विफ्ट डिझायर गाडीतून फिर्यादीच्या घरासमोर आले.
आरोपींपैकी सागर गुंजेकर याच्या हातात कुऱ्हाड होती, तर अक्षय गुंजेकर, आनंद पवार, अमित पटारे व उमर शेख हे कारमधून बाहेर उतरून शिवीगाळ करू लागले.
या दरम्यान आरोपी अक्षय गुंजेकर व उमर शेख यांनी तलवार हवेत फिरावली, तर आनंद पवार व अमित पटारे यांनी चाकू बाहेर काढून दहशत निर्माण केली. तसेच सागर गुंजेकर याने गाडीत बसलेल्या अमितला आवाज देऊन अंगावर गाडी घालून जीवे मारण्यास सांगितले. त्यानुसार अमित पटारे याने स्विफ्ट डिझायर कार फिर्यादीचे चुलते शफी नवाब पठाण यांच्या अंगावर जोराने घालून त्यांना गंभीर जखमी केले व जीवे मारण्याचा प्रयत्न केला. या हल्ल्यात फिर्यादीचे चुलते गंभीर जखमी होऊन त्यांचा मृत्यू झाला. याप्रकरणी श्रीरामपूर शहर पोलीस ठाण्यात गुन्हा दाखल करण्यात आला आहे.
घटनेची माहिती मिळताच सहाय्यक पोलीस निरीक्षक चेतन लोखंडे आणि त्यांच्या पथकाने घटनास्थळी धाव घेतली. तसेच तांत्रिक विश्लेषण आणि गुप्त बातमीदाराच्या मदतीने शोध घेऊन गुन्ह्यातील आरोपी अमित रावसाहेब कोळगे (रा. भोसले पेट्रोल पंपामागे, दत्तनगर, ता. श्रीरामपूर) आणि अक्षय उर्फ आकाश राहुल गुंजेकर (रा. रांजनखोल, ता. राहाता, जि. अहिल्यानगर) यांना अटक केली असून उर्वरित आरोपींचा शोध सुरू आहे.
सदर धडक कारवाई अहिल्यानगरचे पोलीस अधीक्षक मुमक्का सुदर्शन, अपर पोलीस अधीक्षक वैभव कलुबर्गे, उपविभागीय पोलीस अधिकारी जयदत्त भवर यांच्या मार्गदर्शनाखाली श्रीरामपूर शहर पोलीस ठाण्याचे पोलीस निरीक्षक चेतन लोखंडे, सहाय्यक पोलीस निरीक्षक राम शिखरे, पोलीस उपनिरीक्षक रोशन निकम, पोलीस उपनिरीक्षक विशाल लाहाने, पोलीस अंमलदार गणेश भिंगारदे, किशोर औताडे, रोकडे, सचिन दुकळे, रोहित डोंगरे आणि नंदू लोखंडे यांच्या पथकाने केली असून, गुन्ह्याचा पुढील तपास पोलीस उपनिरीक्षक विशाल लाहाने करत आहेत.