राजापूरमध्ये माणुसकीची दिवाळी: राहुल गांधी समर्थक संघाकडून स्व. विकास हासे यांच्या कुटुंबाला मदतीचा हात

महाराष्ट्र संवाद न्यूज ऑनलाईन-
दिवाळी हा आनंद आणि आपुलकीचा सण असला तरी, संगमनेर तालुक्यातील राजापूर येथील स्व. विकास हासे यांच्या कुटुंबासाठी यंदाची दिवाळी दुःखाची सावली घेऊन आली. अवघ्या दोन महिन्यांपूर्वी अल्पशा आजाराने विकास हासे यांचे निधन झाले. त्यांच्या पश्चात पत्नी आणि दोन लहान मुले असा परिवार असून, कुटुंबाचा मुख्य आधार हरवल्याने या कुटुंबावर मोठे संकट ओढवले आहे. या कठीण काळात राहुल गांधी समर्थक संघाच्या वतीने (RGSS) हासे कुटुंबाला आर्थिक मदतीचा हात पुढे करत एक आदर्श सामाजिक बांधिलकी जपली आहे.
दिवाळीच्या पार्श्वभूमीवर संघाच्या पदाधिकाऱ्यांनी राजापूर येथे जाऊन हासे कुटुंबाची प्रत्यक्ष भेट घेतली आणि त्यांना आर्थिक मदत सुपूर्द केली. याशिवाय कुटुंबाला दिवाळीचा फराळ व गोड पदार्थही भेट देण्यात आले. दुःखाच्या या प्रसंगी मदतीचा आधार पाहून कुटुंबीय भावूक झाले, तर त्यांच्या डोळ्यांतील अश्रूंनी उपस्थित लोकांचेही मन हेलावून गेले. स्व. विकास हासे यांची अनुपस्थिती या कुटुंबाला किती तीव्रतेने जाणवत आहे, याची जाणीव यावेळी सर्वांना झाली.
सण साजरा करताना गरजू कुटुंबाच्या चेहऱ्यावर आनंद फुलवणे हीच खरी सामाजिक बांधिलकी असून, मदतीच्या रकमेपेक्षा दुःखाच्या काळात कोणीतरी आपलेपणाने पाठीशी उभे असणे अधिक मोलाचे असते, या विचारातून राहुल गांधी समर्थक संघाच्या माध्यमातून माणुसकीचा खरा दिवा प्रज्वलित झाला आहे.
या भेटीदरम्यान पदाधिकाऱ्यांनी कुटुंबीयांचे सांत्वन करत त्यांना धीर दिला. तसेच मुलांच्या शिक्षणासाठी भविष्यात कोणतीही अडचण किंवा मदतीची गरज भासल्यास निःसंकोच संपर्क साधावा, राहुल गांधी समर्थक संघ सर्वतोपरी मदत करण्यासाठी सदैव तत्पर राहील, अशी ग्वाही त्यांनी दिली.
या संवेदनशील प्रसंगी स्व. विकास हासे यांचे चुलते व चुलत भाऊ उपस्थित होते. तसेच राहुल गांधी समर्थक संघाचे प्रकाश कडलग, राम अरगडे, अरुण चव्हाण, शंतनू भालेकर, सतीश खताळ, रवींद्र हासे, प्रवीण हासे, मोहसीन शेख आणि अमोल शेलकर यांनी या सामाजिक उपक्रमात सहभाग घेतला.