महाराष्ट्र संवाद न्यूज ऑनलाईन- संगमनेर तालुक्यातील गुंजाळवाडी येथील गुंजाळ पाटील मळ्यात एका लग्नसमारंभादरम्यान गर्दीचा फायदा घेऊन नागरिकांच्या गळ्यातील सोन्याच्या चेन लांबवणाऱ्या चोरांचा संगमनेर शहर पोलिसांनी तांत्रिक तपासाच्या आधारे पर्दाफाश केला आहे. या कारवाईत पोलिसांनी चार आरोपी निष्पन्न करून त्यांच्याकडून तब्बल ३ तोळे वजनाच्या तीन सोन्याच्या चेन हस्तगत केल्या आहेत.
अहिल्यानगरचे पोलीस अधीक्षक मुमक्का सुदर्शन, श्रीरामपूरचे अपर पोलीस अधीक्षक सोमनाथ वाघचौरे, संगमनेर उपविभागाचे उपविभागीय पोलीस अधिकारी डॉ. कुणाल सोनवणे आणि संगमनेर शहर पोलीस स्टेशनचे पोलीस निरीक्षक समीर बारवकर यांच्या मार्गदर्शनाखाली संगमनेर शहर पोलीस ठाण्याच्या पथकाने ही कारवाई केली आहे.
०३ मे २०२६ रोजी रात्री ८:३० ते ९:०० वाजण्याच्या दरम्यान गुंजाळ पाटील मळा, गुंजाळवाडी येथे फिर्यादी राकेश रमेश शिंदे (वय २४ वर्षे, रा. गणेशगर, गल्ली नं. १५, संगमनेर) हे आपले मित्र विश्वनाथ भागवत काळे आणि प्रसाद सदाशिव कडलग यांच्यासह इंदोरीकर महाराज यांच्या मुलीच्या लग्नासाठी आले होते. सदर ठिकाणी अज्ञात इसमानी गर्दीचा फायदा घेऊन फिर्यादी व त्यांच्या मित्रांच्या गळ्यातील सोन्याच्या चेन चोरून नेल्या होत्या.
या प्रकरणी राकेश शिंदे यांच्या फिर्यादीवरून संगमनेर शहर पोलीस ठाण्यात ३८१/२०२६ बी.एन.एस. कलम ३०३(२) प्रमाणे गुन्हा दाखल करण्यात आला होता. गुन्ह्याच्या अनुषंगाने पोलीस निरीक्षक समीर बारवकर यांच्या मार्गदर्शनाखाली पोलीस उपनिरीक्षक सुरज मेढे, पोलीस हवालदार बाबासाहेब यशवंत सातपुते आणि पोलीस कॉन्स्टेबल सागर मच्छिंद्र नागरे यांच्या पथकाने तांत्रिक तपास केला.
पोलिसांनी घटनास्थळावरील सी.सी.टी.व्ही. फुटेजचे कसून विश्लेषण केले, यामध्ये चार आरोपी निष्पन्न झाले. पोलिसांनी आरोपींकडून ३०,००० रुपये किमतीची १ तोळे वजनाची राकेश शिंदे यांची सोन्याची चेन, ४५,००० रुपये किमतीची १५ ग्रॅम वजनाची विश्वनाथ काळे यांची सोन्याची चेन आणि २४,००० रुपये किमतीची ८ ग्रॅम वजनाची प्रसाद कडलग यांची सोन्याची चेन अशी एकूण तीन सोन्याची चेन हस्तगत केली आहे.
जप्त करण्यात आलेल्या या सोन्याच्या चेन फिर्यादी व साक्षीदार यांच्या ताब्यात देण्यात आल्या आहेत. सदर गुन्ह्याचा पुढील तपास पोलीस हवालदार सातपुते करत आहेत.
