महाराष्ट्र संवाद न्यूज ऑनलाईन- मंत्रालयातील विविध कामांच्या निमित्ताने मुंबईत गेलेले आमदार अमोल खताळ यांनी मूळचे संगमनेरचे असलेले टॅक्सीचालक महेश चकोर यांच्या टॅक्सीतून प्रवास करत आपुलकीने संवाद साधला. सर्वसामान्य जनतेच्या सुखदुःखात सहभागी होणारा कार्यकर्ता ही आपली ओळख त्यांनी मुंबईसारख्या महानगरातही जपली असून, त्यांच्या या साधेपणाचे सर्वत्र कौतुक होत आहे.
महेश चकोर हे गेल्या अनेक वर्षांपासून मुंबईत टॅक्सी चालवून आपला उदरनिर्वाह करतात. आमदार खताळ मुंबईत आल्याचे समजताच चकोर यांनी त्यांना आपल्या टॅक्सीतून प्रवास करण्याचा आग्रह धरला. त्यांच्या प्रेमळ आग्रहाखातर आमदार खताळ यांनी कोणतीही पदाची प्रतिष्ठा आड न आणता टॅक्सीतून सफर केली.
या प्रवासादरम्यान आमदार खताळ यांनी चकोर यांच्या कुटुंबाची, व्यवसायाची आणि मुंबईतील जीवनमानाची आस्थेने विचारपूस केली. गावापासून दूर राहून कष्टाने व्यवसाय करणाऱ्या संगमनेरच्या या भूमिपुत्राचे अनुभव त्यांनी जाणून घेतले. कामाच्या प्रचंड व्यापातही सर्वसामान्य माणसांशी जोडलेली नाळ तुटू न देता, सामान्य कार्यकर्त्याला आपलेसे करण्याचा आमदार खताळ यांचा स्वभाव या प्रसंगातून अधोरेखित झाला आहे.