बॅनरबाजी थांबवा, आधी विकासकामे दाखवा! आमदार अमोल खताळ यांनी आभासी विकासाच्या प्रतिमेतून बाहेर पडावे! माजी तालुका युवक काँग्रेस अध्यक्ष आनंद वर्पे यांचा आमदारांना सल्ला
महाराष्ट्र संवाद न्यूज ऑनलाईन- संगमनेर तालुक्यात सध्या प्रत्यक्ष विकासकामांपेक्षा गावोगावी बॅनरबाजी करून विकास झाल्याचे आभासी चित्र निर्माण करण्याचा प्रयत्न सुरू आहे. आमदार अमोल खताळ यांनी या दिखाऊपणातून बाहेर पडून प्रत्यक्ष विकासकामांवर लक्ष केंद्रित करावे, असा सडेतोड सल्ला माजी तालुका युवक काँग्रेस अध्यक्ष आनंद वर्पे यांनी दिला आहे.
माजी आमदार बाळासाहेब थोरात यांच्या कार्यकाळात मंजूर झालेल्या विकासकामांवर स्वतःच्या नावाचे लेबल लावून श्रेय लाटण्याचा प्रकार सुरू असल्याचा आरोप वर्पे यांनी केला. तसेच पदवीधर मतदारसंघाचे आमदार सत्यजित तांबे यांच्या दूरदृष्टीतून आणि प्रयत्नांतून सुरू असलेल्या कामांचेही श्रेय स्वतःकडे घेऊन टेंभा मिरवणे थांबवावे, असे त्यांनी स्पष्ट केले.
वडगावपानमधील ॲसिड हल्ल्याचा आरोपी अजूनही मोकाट असल्याचा मुद्दा उपस्थित करताना केवळ भाषणबाजी आणि आश्वासनांपेक्षा कायदा-सुव्यवस्थेच्या प्रश्नावर ठोस कृती करण्याची गरज असल्याचे त्यांनी सांगितले. गावोगावी आश्वासित करण्यात आलेले रस्ते अखेरची घटका मोजत आहेत. दुष्काळी परिस्थितीत वीज आणि पाण्याचा प्रश्न गंभीर बनला असून, दुष्काळग्रस्त भागातील शेतकऱ्यांना चारा छावण्यांची अजूनही प्रतीक्षा करावी लागत आहे. अशा परिस्थितीत मूलभूत प्रश्नांकडे दुर्लक्ष होत असल्याची टीकाही त्यांनी केली.
तालुक्यातील जनतेला रस्ते, पाणी, वीज, शेती आणि रोजगार यांसारख्या मूलभूत प्रश्नांवर उत्तर हवे आहे. मात्र, विकासाच्या प्रश्नांऐवजी जिरवाजिरवीचे राजकारण, कार्यक्रमबाजी आणि ‘बघून घेतो’, ‘बंदोबस्त करतो’ अशा पोकळ धमक्यांतून जनतेचे मनोरंजन करण्याचा प्रकार सुरू असल्याचा टोला वर्पे यांनी लगावला.
आमदारांनी वेळीच आत्मपरीक्षण करून हमरीतुमरीच्या राजकारणापेक्षा विकासात्मक आणि सकारात्मक दृष्टिकोन स्वीकारावा. लोकशाहीत जनतेच्या निर्णयाचा आदर ठेवून लोकांच्या अपेक्षांनुसार काम करावे. विरोधकांशी संघर्ष करण्यापेक्षा तालुक्याच्या विकासासाठी निधी आणणे आणि मंजूर कामे मार्गी लावणे याला प्राधान्य द्यावे, असे आवाहनही त्यांनी केले.
बाकी राजकीय लढाई २०२९ मध्ये होईलच; मात्र तोपर्यंतचा काळ हा बॅनरबाजी, श्रेयवाद आणि राजकीय कुरघोड्यांमध्ये वाया न घालवता निधी, विकासकामे आणि संगमनेर तालुक्याच्या प्रगतीसाठी वापरावा. राजकारण निवडणुकीपुरते आणि विकास जनतेसाठी असतो, याचे भान आमदारांनी ठेवावे, असा सल्ला आनंद वर्पे यांनी दिला.