महाराष्ट्राच्या राजकीय आणि सामाजिक इतिहासात काही व्यक्तिमत्त्वे अशी असतात, ज्यांचे अस्तित्व काळाच्या मर्यादा ओलांडून पिढ्यान्पिढ्या प्रेरणा देत राहते. हिंदुहृदयसम्राट वंदनीय शिवसेनाप्रमुख बाळासाहेब ठाकरे हे असेच एक झंझावाती व्यक्तिमत्त्व!
बाळासाहेब म्हणजे केवळ एक नेता नव्हते, तर मराठी माणसाच्या अस्मितेचा बुलंद आवाज होते. अन्यायाविरुद्ध पेटून उठणारी जिद्द, हिंदुत्वाविषयीची ठाम भूमिका, मराठी माणसाच्या हक्कांसाठी लढण्याची निर्भीड वृत्ती आणि कार्यकर्त्यांवर जीवापाड प्रेम करणारे नेतृत्व म्हणजे बाळासाहेब ठाकरे!
१९ जून १९६६ रोजी शिवसेनेची स्थापना करून त्यांनी मराठी माणसाला संघटित होण्याची ताकद दिली. सामान्य माणसाच्या मनातील असंतोषाला त्यांनी संघर्षाची दिशा दिली. शिवसेना ही केवळ राजकीय संघटना न राहता ती प्रत्येक शिवसैनिकाच्या स्वाभिमानाची, निष्ठेची आणि अस्मितेची ओळख बनली.
बाळासाहेबांची सर्वात मोठी ताकद म्हणजे त्यांचे विचार आणि त्यांचे शिवसैनिक! त्यांनी कधीही सत्तेपेक्षा संघटनेला मोठे मानले. पदापेक्षा निष्ठेला महत्त्व दिले आणि राजकारणापेक्षा माणुसकीला प्राधान्य दिले. त्यांच्या एका हाकेवर हजारो शिवसैनिक रस्त्यावर उतरायचे, कारण त्या आवाजामध्ये विश्वास होता, आपलेपणा होता आणि अन्यायाविरुद्ध लढण्याची प्रेरणा होती. सामान्य माणसातून नेतृत्व घडवणारी शिवसेना!
वंदनीय बाळासाहेब ठाकरे यांनी नेहमीच सामान्य माणसाला नेतृत्व करण्याची संधी दिली. त्यांच्या विचारांचा वारसा सांगणाऱ्या शिवसेनेत आजही सामान्य कुटुंबातील कार्यकर्त्याला मोठी जबाबदारी मिळू शकते, याचे उदाहरण म्हणजे संगमनेरचे आमदार अमोलभाऊ खताळ. आज शिवसेनेचा शहरप्रमुख म्हणून काम करताना मला जाणवते की, बाळासाहेबांचे विचार केवळ भाषणातून व्यक्त करण्यासाठी नाहीत, तर ते आपल्या कृतीतून जगण्याची गरज आहे. सामान्य नागरिकांच्या अडचणींसाठी धावून जाणे, अन्यायाविरुद्ध आवाज उठवणे, गोरगरीबांच्या मदतीला उभे राहणे आणि संघटनेतील प्रत्येक कार्यकर्त्याला सन्मान देणे, हीच त्यांना खरी आदरांजली ठरू शकते.
आजच्या बदलत्या राजकीय परिस्थितीतही बाळासाहेबांचे विचार तितकेच महत्त्वाचे आहेत. कारण शिवसैनिक होणे म्हणजे केवळ भगवा झेंडा हातात घेणे नाही, तर संकटात सामान्य माणसाच्या पाठीशी उभे राहणे, दिलेला शब्द पाळणे आणि संघटनेशी प्रामाणिक राहणे होय.
बाळासाहेबांनी आम्हाला शिकवलेला स्वाभिमान, संघर्ष, निष्ठा आणि हिंदुत्वाचा विचार पुढे घेऊन जाणे, ही प्रत्येक शिवसैनिकाची जबाबदारी आहे. त्यांचे विचार आमच्यासाठी केवळ इतिहास नाहीत, तर वर्तमानाला दिशा देणारी आणि भविष्य घडवणारी ऊर्जा आहे.
बाळासाहेब आज आपल्यात देहाने नसले, तरी प्रत्येक शिवसैनिकाच्या मनात त्यांचा विचार जिवंत आहे. जोपर्यंत भगवा फडकत राहील, जोपर्यंत अन्यायाविरुद्ध शिवसैनिकाचा आवाज घुमत राहील, तोपर्यंत बाळासाहेबांचे विचार कधीही संपणार नाहीत!
कारण… बाळासाहेब हे एक व्यक्तिमत्त्व नव्हते, ते एक वादळ होते. ते एक नेतृत्व नव्हते, ती एक विचारधारा होती. आणि शिवसेना ही केवळ संघटना नव्हती, ती मराठी माणसाच्या स्वाभिमानाची चळवळ होती! वंदनीय हिंदुहृदयसम्राट बाळासाहेब ठाकरे यांच्या पवित्र स्मृतींना विनम्र अभिवादन! जय महाराष्ट्र! विनोद मनोहर सूर्यवंशी (शहरप्रमुख, शिवसेना संगमनेर शहर)