राज्यात खळबळ..! तहसीलदार निलंबित; ‘ते’ प्रकरण भोवलं
आता या प्रकरणात सुराणा यांचे निलंबन मागे घेतले जाणार की अन्य काही अधिकाऱ्यांवर कारवाईचा बडगा उगारला जाणार, याकडे संपूर्ण प्रशासनाचे लक्ष लागून राहिले आहे
जिल्ह्यातील अवैध वाळू उपसा आणि गौणखनिज चोरीच्या प्रकरणात मोठी कारवाई करत अमळनेरचे तहसीलदार रूपेशकुमार सुराणा यांना निलंबित करण्यात आले आहे. गौणखनिज चोरी व अवैध वाहतुकीवर रोख लावण्यात निष्काळजीपणा आणि बेजबाबदारपणा दाखवल्याचा ठपका ठेवत महसूल व वन विभागाने हे निलंबनाचे आदेश जारी केले आहेत.
या कारवाईमुळे संपूर्ण महसूल विभागात तीव्र खळबळ उडाली असून, चौकशीअंती आणखी एका तहसीलदारावर कारवाई प्रस्तावित असल्याची चर्चा रंगल्याने इतर अधिकाऱ्यांचेही धाबे दणाणले आहेत.
हे संपूर्ण प्रकरण सावखेडा येथील वाळू घाटाशी संबंधित आहे. २६ मे रोजी या घाटावर नियमबाह्य पद्धतीने मशीनद्वारे मोठ्या प्रमाणावर वाळूचा उपसा सुरू असल्याचे महसूल व पोलिसांच्या संयुक्त कारवाईत उघडकीस आले होते. गौणखनिज उत्खननाच्या नियमांचे गंभीर उल्लंघन झाल्याचे स्पष्ट होताच जिल्हाधिकारी रोहन घुगे यांनी सुरुवातीला सावखेडा येथील मंडळाधिकारी कल्याणी पाटील आणि तलाठी पवनकुमार शिंगारे यांना तत्काळ निलंबित केले होते.
या प्रकरणाच्या सखोल चौकशीची जबाबदारी अमळनेरचे प्रांताधिकारी मयूर भंगाळे यांच्याकडे सोपवण्यात आली होती. त्यांनी आपला चौकशी अहवाल जिल्हाधिकाऱ्यांकडे सादर केल्यानंतर मिळालेल्या निष्कर्षांच्या आधारे गुरुवारी तहसीलदार सुराणा यांच्या निलंबनाचे अधिकृत आदेश प्रशासनाला प्राप्त झाले.
दुसरीकडे, या कारवाईविरोधात महसूल अधिकारी संघटना आक्रमक झाली असून ती तहसीलदार सुराणा यांच्या समर्थनार्थ पुढे आली आहे. सुराणा यांनी अवैध वाळू उपशाविरोधात सातत्याने कारवाया केल्याचे पुरावे उपलब्ध असून, त्यांच्यावर केलेली ही कारवाई एकतर्फी व अन्यायकारक असल्याचा दावा संघटनेने केला आहे. सुराणा यांना सुनावणीची योग्य संधी देऊन त्यांचे निलंबन तत्काळ मागे घ्यावे आणि त्यांची अमळनेर येथे पुनर्नियुक्ती करावी, अशी मागणी संघटनेने जिल्हाधिकाऱ्यांमार्फत महसूल विभागाच्या अपर सचिवांकडे पत्राद्वारे केली आहे.
आता या प्रकरणात सुराणा यांचे निलंबन मागे घेतले जाणार की अन्य काही अधिकाऱ्यांवर कारवाईचा बडगा उगारला जाणार, याकडे संपूर्ण प्रशासनाचे लक्ष लागून राहिले आहे.
