संगमनेर, दि. २६ मार्च – प्रतिनिधी
संगमनेर तालुक्यातील ग्रामीण विकासाला चालना देण्यासाठी आमदार अमोल खताळ यांनी ११ कोटी १८ लाख रुपयांचा निधी मंजूर करून घेतला आहे. पालकमंत्री राधाकृष्ण विखे यांच्या सहकार्याने जिल्हा नियोजन व विकास समितीच्या माध्यमातून हा निधी मंजूर करण्यात आला आहे.
या निधीतून तालुक्यातील ग्रामीण भागातील रस्त्यांचा विकास, जिल्हा परिषदेच्या शाळा खोल्यांचे बांधकाम तसेच अन्य नागरी सुविधांची कामे होणार आहेत. जिल्हा नियोजन व विकास समितीच्या माध्यमातून तालुक्यातील विकास कामांच्या संदर्भात दाखल झालेल्या प्रस्तावांना मंजूरी मिळाल्याने या विकास कामांसाठी हा निधी मिळण्याचा मार्ग मोकळा झाला आहे.
आमदार खताळ म्हणाले, तालुक्यातील १९ रस्त्यांसाठी ३ कोटी ७० लाख रुपये मंजूर झाले असून, यामध्ये प्रामुख्याने मौजे चिखली ते केरेवाडी रस्ता (२० लाख रुपये), वडगाव लांडगा ते दातीर वस्ती (३० लाख रुपये), राजापूर ते खतोडे मळा रस्ता (३० लाख रुपये), धांदरफळ खुर्द ते धांदरफळ बुद्रुक पुल दुरुस्ती (४० लाख रुपये), नांदूरीदुमाला ते ठाकरवाडी रस्ता (२० लाख रुपये), निमगाव खुर्द ते चंदनवाडी रस्ता (३० लाख रुपये), सायखिंडी ते कारवाडी रस्ता (२० लाख रुपये), संगमनेर ते झोळे रस्ता (३० लाख रुपये), कासारे ते कानकाटे वस्तीपर्यंत रस्ता (४० लाख), वडझरी ते कारेवाडी रस्ता (३० लाख रुपये), कुंभारदरा ते कर्जुलेपठार रस्ता (३० लाख रुपये), कौठे मलकापूर ते ठाकरवाडी रस्ता (३० लाख रुपये), नांदूरखंदरमाळ ते खैरदरा रस्ता (३० लाख रुपये) ही कामे केली जाणार आहेत.
अन्य महत्वपूर्ण रस्त्यांमध्ये कासारादुमाला ते मंगळापूर शिव रस्त्यासाठी (५० लाख रुपये), वेल्हाळे ते सायखिंडी मोठेबाबा रस्ता (३० लाख रुपये), कोकणगाव ते निझर्णेश्वर देवस्थान (४० लाख रुपये, रायतेवाडी ते हिवरगाव पावसा (५० लाख रुपये), सुकेवाडी ते कसबेवाडी रस्ता (२० लाख रुपये), सावरचोळ ते शिसरगाव धूपे जवळेबाळेश्वर रस्त्यासाठी ५० लाख रुपयांचा निधी उपलब्ध होत आहे. या रस्त्यांमुळे ग्रामीण भागातील शेतकरी, शालेय विद्यार्थी आणि नागरिकांना शहरात ये-जा करणे सोपे होणार आहे.
तसेच, जिल्हा परिषद प्राथमिक शाळांच्या खोल्यांसाठी १ कोटी १२ लाख रुपयांचा निधी मंजूर करण्यात आला आहे. या निधीतून बिरेवाडी, पिंपळगाव कोंझीरा, निळवंडे, डोळासणे, हिवरगाव पावसा, तळेगाव धनगरवाडी, पोखरी हवेली आणि मांडवे बुद्रुक येथील शाळांच्या खोल्यांची कामे पूर्ण होणार आहेत. आमदार खताळ यांच्या स्थानिक विकास निधीतून २ कोटी ८६ लाख रुपये मंजूर करण्यात आले आहेत. या निधीतून सभागृह, गावांचे सुशोभीकरण, सभामंडप, मंदिर दुरुस्ती आणि दशक्रिया विधी घाट यांसारखी सार्वजनिक कामे होणार आहेत.
महायुती सरकारच्या माध्यमातून विकास प्रक्रिया वेगाने सुरू झाली शहरांबरोबर ग्रामीण भागाच्या विकासाला निधी उपलब्ध करून देण्याचे काम सरकारच्या माध्यमातून होत आहे. भविष्यातही अधिकचा निधी तालुक्याच्या पायाभूत सुविधांसाठी उपलब्ध होणार आहे. या निधीमुळे तालुक्यातील ग्रामीण भागाच्या विकासाला चालना मिळणार असून, नागरिकांच्या जीवनात सुधारणा होईल, असा विश्वास आमदार खताळ यांनी व्यक्त केला आहे.
