शिर्डी, दि. ३१ मार्च –
शिर्डी एमआयडीसीमध्ये सुरू होणाऱ्या डिफेन्स क्लस्टर प्रकल्पाच्या माध्यमातून जिल्ह्याच्या औद्योगिक विकासाला चालना मिळणार आहे, तसेच रोजगाराच्या संधींमध्ये वाढ होईल, असे प्रतिपादन राज्याचे जलसंपदा मंत्री आणि जिल्ह्याचे पालकमंत्री डॉ. राधाकृष्ण विखे पाटील यांनी केले.
सावळीविहीर खुर्द येथील शिर्डी औद्योगिक वसाहतीमध्ये डिफेन्स क्लस्टरअंतर्गत ‘निबे ऑर्डनन्स ग्लोबल लिमिटेड’ (शेल फोर्जिंग) कंपनीच्या भूमीपूजन समारंभात ते बोलत होते. या कार्यक्रमात आमदार आशुतोष काळे, माजी खासदार डॉ. सुजय विखे पाटील, निबे प्रायव्हेट लिमिटेडचे गणेश निबे, एमआयडीसीचे प्रादेशिक व्यवस्थापक गणेश राठोड यांच्यासह अनेक मान्यवर उपस्थित होते.
डॉ. विखे पाटील यांनी सांगितले की, शिर्डी एमआयडीसीमध्ये डिफेन्स क्लस्टरच्या माध्यमातून नवीन औद्योगिक पर्व सुरू होत आहे. शिर्डी विमानतळावरून रात्रीच्या वेळी विमान उतरण्याची सुविधा सुरू झाल्याने येथील औद्योगिक विकासाला अधिक चालना मिळेल.
एमआयडीसीने डिफेन्स क्लस्टरसाठी मोफत जमीन उपलब्ध करून दिली आहे. या ठिकाणी टाटा कंपनीच्या मदतीने २५० कोटी रुपयांचे प्रशिक्षण केंद्र सुरू करण्यात येणार आहे, ज्यामध्ये उद्योगांसाठी आवश्यक असणाऱ्या कुशल मनुष्यबळाला प्रशिक्षण दिले जाईल. पशुसंवर्धन विभागाकडील ३०० एकर जमीन कोपरगाव औद्योगिक वसाहतीसाठी उपलब्ध करून देण्यासाठी शासन प्रयत्नशील आहे, असेही त्यांनी सांगितले.
शिर्डीचा विकास आणि औद्योगिक विस्तारासाठी ग्रामस्थांनी विचारविनिमय आणि समन्वयाने निर्णय घ्यावा, असे आवाहन त्यांनी केले. शिर्डी साईबाबा संस्थानच्या माध्यमातून ११ नंबर चारीच्या विस्तारासाठी २२ कोटी रुपये आणि थीम पार्कसाठी ४० कोटी रुपये मंजूर करण्यात आले आहेत, असेही पालकमंत्र्यांनी सांगितले.
केंद्र सरकारच्या आत्मनिर्भर योजनेमुळे अनेक तरुण स्टार्टअप कंपन्या स्थापन करत आहेत. तरुणांनी जागतिकीकरणामुळे उपलब्ध झालेल्या संधींचा लाभ घेऊन आर्थिक उन्नती साधावी, असे आवाहन त्यांनी केले.
आमदार आशुतोष काळे यांनी सांगितले की, शिर्डी एमआयडीसीमुळे परिसरातील स्थानिक तरुणांना रोजगाराच्या संधी उपलब्ध होतील. गणेश निबे यांनी सांगितले की, डिफेन्स क्लस्टरच्या माध्यमातून पाच लाख बॉम्ब शेलची निर्मिती होणार असून या कंपनीच्या माध्यमातून तीन हजार रोजगार निर्माण होतील. या कार्यक्रमाचे प्रास्ताविक मंगेश जोशी यांनी केले.
