संगमनेर, दि. ७ एप्रिल – प्रतिनिधी
संगमनेरमधील प्रतिष्ठित डॉ. अमोल कर्पे याने अल्पवयीन मुलीवर केलेल्या बलात्कारामुळे शहरात संतापाची लाट उसळली आहे. या घटनेचा तीव्र निषेध करत शिवसेना (उद्धव बाळासाहेब ठाकरे) पक्षाचे माजी शहर प्रमुख अमर कतारी यांनी आरोपी डॉ. अमोल कर्पे याला फाशीची शिक्षा देण्याची मागणी केली आहे. या मागणीसाठी आज शिवसेना आणि महिला आघाडीच्यावतीने पोलीस उप अधीक्षक कुणाल सोनवणे यांना निवेदन देण्यात आले. त्यानंतर या सर्व पदाधिकारी, शिवसैनिकांनी डॉ. कर्पे याच्या रुग्णालयात जात निदर्शने केली.
निवेदनात शिवसेनेने स्पष्टपणे म्हटले आहे की, संगमनेर शहर आणि तालुक्यातील आरोग्यसेवेच्या चांगल्या परंपरेला डॉ. अमोल कर्पे याच्या कृत्याने काळीमा फासला आहे. एका निष्पाप अल्पवयीन मुलीवर लैंगिक अत्याचार करण्याची घटना अत्यंत निंदनीय असून, याप्रकरणी संगमनेर शहर पोलीस स्टेशनमध्ये बलात्कार आणि पोक्सो कायद्यांतर्गत गुन्हा दाखल करण्यात आला आहे. ऑनलाइन माध्यम आणि वृत्तपत्राद्वारे ही धक्कादायक घटना समोर आल्यानंतर पीडितेला न्याय मिळवून देण्यासाठी शिवसेना आक्रमक झाली आहे.
शिवसेनेने मागणी केली आहे की, डॉ. अमोल कर्पे याचे प्रॅक्टिशनर लायसन्स आणि त्यांच्या रुग्णालयाचा परवाना तातडीने निलंबित करण्यात यावा. तसेच, जिल्हा शल्यचिकित्सक आणि माननीय न्यायाधीश यांच्यामार्फत या प्रकरणी तातडीने कार्यवाही करावी. या गंभीर प्रकरणाची सुनावणी जलदगती न्यायालयात (फास्टट्रॅक कोर्ट) चालवून आरोपीला कठोर शिक्षा ठोठावण्यात यावी, अशी मागणीही निवेदनात करण्यात आली आहे.
यावेळी माजी शहर प्रमुख अमर कतारी यांनी प्रशासनाला २४ तासांचा अल्टिमेटम दिला आहे. त्यांनी स्पष्ट शब्दांत इशारा दिला आहे की, जर या वेळेत आरोपी डॉक्टर आणि त्याच्या रुग्णालयावर कारवाई झाली नाही, तर शिवसेना आपल्या ‘स्टाईल’ने त्याला धडा शिकवेल. महिलांच्या सन्मानासाठी आणि त्यांच्या इज्जतीसाठी कायदा व सुव्यवस्था मोडण्याची वेळ आली तरी शिवसेना गप्प बसणार नाही.
महिला आणि मुलींना अशा प्रकारे वागणूक देणाऱ्यांना त्वरित शिक्षा झाली पाहिजे आणि पीडितेला न्याय मिळाला पाहिजे, ही आमची प्रमुख मागणी आहे. तालुक्याचे शासकीय अधिकारी म्हणून आपण या प्रकरणी तातडीने कायदेशीर पाऊले उचलावीत, अशी आमची अपेक्षा आहे.” या निवेदनाची प्रत मुख्यमंत्री देवेंद्र फडणवीस आणि पालकमंत्री राधाकृष्ण विखे पाटील यांना देखील पाठवण्यात आली आहे.
(बघा व्हिडिओ….)
यावेळी शिवसेना माजी शहर प्रमुख अमर कतारी यांच्यासह युवा सेना जिल्हाप्रमुख अमित चव्हाण, माजी तालुका प्रमुख भाऊसाहेब हासे, राष्ट्रवादी (शरद पवार) पक्षाचे सेवानिवृत्त सेलचे राज्य कार्यकारी प्रमुख ज्ञानेश्वर गायकर, शिरीष गुंजाळ, शिवसेनेचे राजू सातपुते, वेणुगोपाल लाहोटी, दीपक साळुंखे, संकेत एखंडे आणि शिवसेनेचे असिफ तांबोळी, फैसल सय्यद, विजू सातपुते, प्रकाश गायकवाड, अमोल डुकरे यांच्यासह अनेक महिला पदाधिकारी उपस्थित होत्या.
शिवसेनेच्या या कठोर भूमिकेमुळे प्रशासनावर आता तातडीने कारवाई करण्याचा दबाव वाढला आहे. या गंभीर घटनेत पीडितेला न्याय मिळतो का, याकडे आता सर्वांचे लक्ष लागले आहे.
