संगमनेर बस स्थानकासमोर, नवीन नगर रोड येथे संगमनेर तालुका युवक काँग्रेस आणि शहरातील विविध सामाजिक घटकांनी एकत्रितपणे महाराष्ट्र दिनाच्या निमित्ताने ‘समतेची मिसळ’ कार्यक्रमाचे आयोजन केले होते. याप्रसंगी काँग्रेसचे ज्येष्ठ नेते माजी मंत्री बाळासाहेब थोरात, माजी आमदार डॉ. सुधीर तांबे, माजी नगराध्यक्ष दुर्गाताई तांबे, उद्योजक राजेश मालपाणी, काँग्रेस अध्यक्ष डॉ. जयश्री थोरात यांच्यासह काँग्रेस पक्षाचे आणि संगमनेरातील ६० हून अधिक समाजांचे प्रतिनिधी व कार्यकर्ते मोठ्या संख्येने उपस्थित होते.
यावेळी बोलताना बाळासाहेब थोरात म्हणाले, “युवक काँग्रेसच्या प्रयत्नातून आणि विविध समाजातील नागरिकांच्या एकत्रीकरणामुळे हा उपक्रम यशस्वी झाला आहे. यात कोणताही भेदभाव नाही, केवळ एकता आहे. भारतात सामाजिक विविधता असली तरी, मानवतेचा धर्म अधिक बलवान असणे गरजेचे आहे आणि ही एकत्रित मिसळ त्याच भावनेचे प्रतीक आहे. वारकरी संप्रदायात जसा काला पवित्र मानला जातो, त्याचप्रमाणे ही समतेची मिसळ एकतेचा संदेश देणारा प्रसाद आहे. संत ज्ञानेश्वर, छत्रपती शिवाजी महाराज, छत्रपती संभाजी महाराज, महात्मा फुले, शाहू महाराज आणि डॉ. बाबासाहेब आंबेडकर यांसारख्या महान विभूतींनी समतेचा विचार महाराष्ट्रातून देशाला दिला आहे आणि ‘समतेची मिसळ’ हा उपक्रम त्याच विचारांना पुढे नेणारा आणि देशाला दिशा देणारा आहे.”
डॉ. जयश्री थोरात म्हणाल्या, “महाराष्ट्राला छत्रपती शिवाजी महाराज, छत्रपती संभाजी महाराज, महात्मा फुले, शाहू महाराज आणि डॉ. बाबासाहेब आंबेडकर यांच्यासारख्या महान समाजसुधारकांच्या विचारांची आणि संस्कारांची मोठी परंपरा आहे. जातीच्या नावावर होणारे राजकारण अत्यंत चुकीचे आहे. मानवता धर्म हा सर्वात मोठा असून तो जपण्यासाठीच ‘समतेची मिसळ’ हा उपक्रम सर्वांनी मिळून आयोजित केला आहे. शहरातील आणि तालुक्यातील सर्व समाजबांधवांनी यात सक्रिय सहभाग घेतला आणि विविध वस्तू देऊन या समतेच्या मिसळीला आकार दिला. आपल्याला याच एकजुटीने पुढे जायचे आहे.”
दुर्गाताई तांबे यांनी ‘सौ शहरी एक संगमनेरी’ या उक्तीचा उल्लेख करत सांगितले की, बाळासाहेब थोरात यांच्या नेतृत्वाखाली संगमनेर शहर आणि तालुक्याने नेहमीच विविध उपक्रमांच्या माध्यमातून ही एकतेची परंपरा जपली आहे.
