पवारांची राष्ट्रवादी अन् काँग्रेसची विचारधारा एकच, फक्त… माजी मंत्री बाळासाहेब थोरात

संगमनेर:
देशात सध्या सुरू असलेली लढाई ही केवळ सत्तेची नसून विचारधारेची आहे, शरद पवार यांच्या राष्ट्रवादी काँग्रेसची आणि काँग्रेसची विचारधारा पूर्णपणे एकच असून राज्यघटना, संतांचे विचार, बहुजन समाज आणि पुरोगामी विचारसरणी हा आपल्या सर्वांचा सामायिक पाया आहे, आम्ही फक्त दोन वेगवेगळ्या ठिकाणी आहोत इतकाच काय तो फरक आहे, शरद पवार हे प्रतिगामी विचारधारा कधीही स्वीकारू शकत नाहीत, असा विश्वास राज्याचे माजी मंत्री बाळासाहेब थोरात यांनी व्यक्त केला.
संगमनेर तालुका दूध संघाच्या कार्यक्रमावेळी राष्ट्रवादी काँग्रेसच्या काँग्रेसमधील संभाव्य विलीनीकरणाच्या चर्चांच्या पार्श्वभूमीवर प्रसारमाध्यमांशी बोलताना थोरात यांनी ही महत्त्वपूर्ण भूमिका मांडली. थोरात यांच्या या राजकीय विधानामुळे राजकारणात नवे संकेत जुळण्याची चिन्हे दिसू लागली आहे.
काँग्रेसमधून बाहेर पडून तयार झालेली तृणमूल काँग्रेस किंवा राष्ट्रवादी काँग्रेस पक्ष वेगवेगळ्या ठिकाणी विभागले गेल्यामुळे शक्ती कमी झाली आहे का, यावर बोलताना थोरात यांनी देशातील सद्यस्थितीवर तीव्र चिंता व्यक्त केली. आज देशात लोकशाही आणि संविधान धोक्यात आले असून सर्व स्वायत्त संस्थांची स्वायत्तता संपत चालली आहे. माध्यमांचा जागतिक निर्देशांक खालावला आहे, माध्यमातून १५६ व्या नंबरवर आले आहे. तर न्यायव्यवस्थेवर दबाव आणला जात आहे. निवडणूक आयोग खरोखर अस्तित्वात आहे का, असा प्रश्न पडावा अशी परिस्थिती निर्माण झाली आहे. अशा संकटकाळात सर्वसामान्य माणसाला दाद मागण्यासाठी जागाच उरलेली नाही. त्यामुळे लोकशाही टिकवण्यासाठी सर्व लोकशाहीवादी शक्तींनी एकत्र येणे आणि एकत्र लढणे ही आपली सर्वांची नैतिक जबाबदारी बनली आहे, असे आवाहन त्यांनी केले.
​या संदर्भात काँग्रेस हाय कमांड महाराष्ट्रातील सर्व प्रमुख नेत्यांशी चर्चा करत असल्याच्या बातम्यांवर थोरात यांनी अत्यंत सावध प्रतिक्रिया दिली. माझ्याशी अद्याप या विषयावर वैयक्तिक पातळीवर कोणतीही चर्चा झालेली नाही. जर माध्यमांकडे याविषयी काही वेगळी माहिती किंवा बातम्या येत असतील तर त्याबाबत मला कल्पना नाही, असे सांगत त्यांनी माध्यमांच्या भूमिकेवर अधिक बोलणे टाळले.
राष्ट्रवादी काँग्रेसच्या स्थापनेच्या वेळी काँग्रेसने मुख्यमंत्रीपदाची ऑफर दिली होती, या छगन भुजबळ यांच्या विधानावर बोलताना थोरात म्हणाले की, छगन भुजबळ हे राजकारणातील एक अत्यंत ज्येष्ठ आणि अनुभवी नेते आहेत, एवढेच मला ठाऊक आहे; मात्र त्यावेळच्या अंतर्गत गोष्टींची मला माहिती नाही. दुसरीकडे, राजकारणात आणि प्रशासनात ‘नालायकपणा’ वाढल्याच्या गणेश नाईक यांच्या वक्तव्याचा समाचार घेताना थोरात यांनी सत्ताधाऱ्यांना टोला लगावला. दोष प्रत्येक ठिकाणी असतात, हे मान्य करत ते म्हणाले की, सध्याच्या सरकारमध्ये आणि राजकारणात दोष इतके वाढले आहेत की, आता त्यात काही ‘चांगले’ शोधण्याची वेळ सर्वसामान्यांवर आली आहे. एकूणच थोरात यांच्या या विधानांमुळे राज्यातील आगामी राजकीय समीकरणांबाबत पुन्हा एकदा चर्चांना उधाण आले आहे.