अपुऱ्या पावसामुळे पाणी जपून वापरण्याचे जलसंपदा मंत्र्यांचे आवाहन; ३१ ऑगस्टपर्यंत पिण्याचे पाणी निश्चित करण्याचे मंत्री विखे पाटलांचे निर्देश

महाराष्ट्र संवाद न्यूज ऑनलाईन
पुणे: 
राज्यातील अपुऱ्या पर्जन्यमानाची पार्श्वभूमी आणि धरणांमधील खालावलेला पाणीसाठा लक्षात घेऊन जलसंपदा मंत्री राधाकृष्ण विखे पाटील यांनी ३१ ऑगस्ट २०२६ पर्यंत नागरिकांना पिण्याच्या पाण्याचा पुरवठा सुनिश्चित करण्यास सर्वोच्च प्राधान्य देण्याचे निर्देश दिले आहेत.
सिंचन भवन येथे आयोजित एका महत्त्वपूर्ण बैठकीत त्यांनी या परिस्थितीचा आढावा घेतला. या बैठकीला कृष्णा व गोदावरी लाभक्षेत्रांतर्गत येणाऱ्या महामंडळांचे कार्यकारी संचालक हनमंत धुमाळ, जयवंत गवळी यांच्यासह मुख्य अभियंता व इतर वरिष्ठ अधिकारी उपस्थित होते.
सध्या राज्यातील धरणांमध्ये एकूण उपयुक्त जलसाठा केवळ ३५७.५ टीएमसी म्हणजेच २५ टक्के इतकाच शिल्लक असून, तो गतवर्षीच्या तुलनेत कमालीचा कमी आहे. चालू वर्षात आतापर्यंत अत्यंत कमी पाऊस झाल्यामुळे धरणांमध्ये नवीन पाण्याची आवक झालेली नाही. ही परिस्थिती अत्यंत गंभीर असल्याने, विशेषतः पुणे आणि पिंपरी चिंचवड महानगर क्षेत्रातील सुमारे ८५ लाख नागरिकांसाठी ३१ ऑगस्टपर्यंत आवश्यक असणारे पाणी राखीव ठेवण्याच्या सूचना मंत्र्यांनी दिल्या आहेत.
तसेच मराठवाडा आणि कृष्णा महामंडळाच्या अंतर्गत येणाऱ्या सर्व धरणे व जलस्रोतांचा तातडीने आढावा घेऊन लोकसंख्येनुसार पिण्याच्या पाण्याचा कोटा निश्चित करण्याचे सांगण्यात आले आहे. यासाठी जलसंपदा विभाग, जिल्हाधिकारी, महानगरपालिका आणि जिल्हा परिषद यांच्यात प्रभावी समन्वय ठेवून पाणी व्यवस्थापनाचा कृती आराखडा तातडीने तयार केला जाणार आहे.
नाशिक आणि मराठवाडा विभागाचा आढावा घेतला असता, नाशिकमध्ये २६ टक्के तर मराठवाड्यात २८ टक्के उपयुक्त जलसाठा शिल्लक आहे. दोन्ही विभागांतील प्रकल्पांमध्ये अपेक्षित पाऊस न झाल्याने, पिण्याच्या पाण्याच्या गरजांना प्राधान्य देऊन उपलब्ध जलसाठ्याचे काटेकोर नियोजन करण्याचे आदेश देण्यात आले आहेत. जोपर्यंत धरणांमध्ये मोठ्या प्रमाणावर नवीन पाण्याची आवक सुरू होत नाही, तोपर्यंत पाण्याचा वापर अत्यंत जपून करावा लागणार आहे. आगामी मान्सूनच्या अनिश्चिततेमुळे प्रत्येक जिल्ह्यासाठी स्वतंत्र कृती आराखडा तयार करून ग्रामीण व शहरी भागातील टंचाई निवारणावर भर दिला जाईल.
अहिल्यानगर जिल्ह्यासह गोदावरी खोऱ्यातील विविध प्रकल्पांची स्थिती पाहता, स्थानिक प्रशासन आणि पाणीपुरवठा यंत्रणांनी समन्वयाने काम करावे आणि नागरिकांमध्ये पाणी बचतीबाबत जनजागृती करावी, असे आवाहनही मंत्री विखे पाटील यांनी केले आहे.
या काळात उपलब्ध पाण्याचा वापर सर्वप्रथम केवळ पिण्यासाठीच केला जाईल, असे स्पष्ट करतानाच बेकायदेशीर पाणी उपसा रोखण्यासाठी महसूल, पोलीस आणि जलसंपदा विभागाच्या संयुक्त पथकांमार्फत तातडीने कडक कारवाई मोहीम राबवण्याचे आदेशही मंत्र्यांनी बैठकीत दिले आहेत.