अकोले:
अकोले तालुक्यातील औरंगपूर फाटा येथे आज दुपारी एक अत्यंत धक्कादायक आणि भीषण स्फोट झाल्याची घटना घडली आहे. दुचाकीवरून स्फोटक पदार्थ वाहून नेत असताना हा स्फोट झाला असून, यामध्ये एक जण गंभीर जखमी झाला आहे. या प्रचंड स्फोटामुळे संपूर्ण अकोले परिसरात खळबळ उडाली असून नागरिकांमध्ये भीतीचे वातावरण निर्माण झाले आहे.
मिळालेल्या प्राथमिक माहितीनुसार, दिलीप उत्तम ताजने (रा. औरंगपूर) हा व्यक्ती आपल्या दुचाकीवरून स्फोटक पदार्थ घेऊन जात होता. औरंगपूर फाट्याजवळ अचानक या स्फोटक पदार्थांचा तीव्र स्फोट झाला. प्रत्यक्षदर्शींनी दिलेल्या माहितीनुसार हा स्फोट इतका भीषण आणि थरारक होता की, स्फोटाच्या तीव्रतेमुळे संबंधित दुचाकी तब्बल ५० फुटांपेक्षा अधिक उंच हवेत उडाली. धक्कादायक बाब म्हणजे हवेत उडाल्यानंतरही त्या दुचाकीचा आणखी एक मोठा स्फोट झाला. या दुर्घटनेनंतर परिसरात मोठ्या प्रमाणावर धुराचे लोट पसरले होते आणि आजूबाजूचे नागरिक भयभीत झाले.
घटनेची माहिती मिळताच अकोले पोलीस प्रशासनाने तातडीने पावले उचलत घटनास्थळी धाव घेतली. घटनेचे गांभीर्य आणि स्फोटाची तीव्रता लक्षात घेऊन तातडीने नाशिक येथील ‘बॉम्ब शोध व नाश पथक’ (BDDS) आणि फॉरेन्सिक विभागाच्या अधिकाऱ्यांना पाचारण करण्यात आले. या पथकांनी घटनास्थळाची बारकाईने पाहणी करून तपासासाठी आवश्यक असलेले नमुने गोळा केले आहेत.
याप्रकरणी सध्या अकोले पोलीस ठाण्यात गुन्हा दाखल करण्याची प्रक्रिया सुरू असून, हे स्फोटक पदार्थ नेमके कुठून आणले होते, त्यात कोणत्या रसायनांचा वापर केला होता आणि यामागे आणखी कोणाचा हात आहे का, या सर्व बाजूने पोलीस आता सखोल तपास करत आहेत.
दुचाकीवरून जात असलेल्या दिलीप उत्तम ताजने याच्या ताब्यातील स्फोटक पदार्थांचा अचानक स्फोट झाला असून तो यामध्ये गंभीर जखमी झाला आहे. प्राथमिक तपासानुसार, सदर व्यक्ती या स्फोटक पदार्थांचा वापर बेकायदेशीररीत्या मासेमारी करण्यासाठी करत होता, असा अंदाज आहे. – डॉ. कुणाल सोनवणे पोलीस उपअधीक्षक संगमनेर
