महाराष्ट्र संवाद न्यूज – संगमनेर
संगमनेर तालुक्यातील महसूल आणि पोलीस प्रशासनाची निष्क्रियता पुन्हा एकदा समोर आली आहे. आमदारांच्या स्पष्ट आदेशानंतरही अवैध वाळू वाहतूक सर्रास सुरू असल्याचे दिसून आले. या पार्श्वभूमीवर, आमदार अमोल खताळ यांनी स्वतः कारवाई करत रविवारी रात्री समनापूर येथून वाळू भरून रायतेवाडीकडे निघालेला डंपर तनपुरवाडी रस्त्यावर पकडला. याप्रकरणी संगमनेर शहर पोलिसांनी दोन वाळू तस्करांसह डंपर चालकावर गुन्हा दाखल केला आहे.
अधिक माहितीनुसार, आमदार अमोल खताळ हे रायतेवाडी येथे एका कार्यक्रमासाठी रविवारी रात्री जात असताना त्यांना तनपुरवाडी रस्त्यावर वाळूने भरलेला डंपर येताना दिसला. तात्काळ त्यांनी आपले वाहन थांबवून डंपर चालकाची विचारपूस केली असता, त्याने समाधानकारक उत्तरे दिली नाहीत. त्यानंतर आमदार खताळ यांनी तातडीने तहसीलदार धीरज मांजरे यांना दूरध्वनीवरून माहिती दिली आणि पोलिसांना गुन्हा दाखल करण्याचे आदेश दिले.
या घटनेनंतर महसूल आणि पोलीस पथक काही वेळानंतर घटनास्थळी दाखल झाले. पोलिसांनी वाळूने भरलेला सुमारे १० लाख रुपये किमतीचा डंपर आणि १५ हजार रुपये किमतीची ३ ब्रास वाळू असा एकूण १० लाख १५ हजार रुपयांचा मुद्देमाल जप्त केला आहे.
https://x.com/amolkhatalpatil/status/1919318640760967588?t=78BChs-rr2hWIBRikxBOiQ&s=19
या संदर्भात सहाय्यक पोलीस निरीक्षक विश्वास भान्सी यांनी संगमनेर शहर पोलीस ठाण्यात फिर्याद दाखल केली आहे. त्यानुसार पोलिसांनी डंपर चालक अरबाज इसाक इनामदार (वय २४, रा. सावरगाव घुले, ता. संगमनेर), वाळू तस्कर शुभम सारंगधर वामन (रा. कोल्हेवाडी, ता. संगमनेर) आणि गोरख हासे (पूर्ण नाव अज्ञात, रा. समनापूर) यांच्या विरोधात पर्यावरण संरक्षण कायद्यान्वये गुन्हा नोंदवला आहे. या प्रकरणाचा पुढील तपास पोलीस निरीक्षक रवींद्र देशमुख यांच्या मार्गदर्शनाखाली पोलीस हेड कॉन्स्टेबल भांगरे करत आहेत.
पोलिसांची एफआयआर अद्याप समोर नाही… दरम्यान या संदर्भात संगमनेर शहर पोलीस ठाण्यात गुन्हा दाखल करण्यात आला असल्याची माहिती आमदार खताळ यांच्या जनसंपर्क कार्यालयाकडून देण्यात आली असली तरी या प्रकरणातील एफआयआर मात्र अद्याप समोर आलेली नाही.
आमदारांचे आदेश आणि प्रशासनाच्या कार्यक्षमतेवर प्रश्नचिन्ह… गेल्या आठवड्यात आमदार अमोल खताळ यांनी पोलीस प्रशासनाच्या वरिष्ठ अधिकाऱ्यांची बैठक घेत संगमनेर शहर व तालुक्यात सुरू असलेले सर्वच प्रकारचे अवैध धंदे बंद करण्याचे आदेश दिले मात्र या आदेशाला न जुमानता संगमनेर मधील अवैध धंदे राजरोसपणे सुरूच आहे. तसेच संगमनेर तालुक्यात प्रवरा नदीच्या पात्रातून मोठ्या प्रमाणात अवैध वाळू उपसा सुरू आहे. मागील दीड ते दोन महिन्यांपूर्वी आमदार अमोल खताळ यांनी जोर्वे नाक्याजवळ वाळूने भरलेला पिकअप पकडून पोलिसांच्या ताब्यात दिला होता. त्यानंतर इतक्या कमी कालावधीत पुन्हा आमदारांना स्वतः वाळू वाहतूक करणारा डंपर पकडावा लागल्याने पोलीस आणि महसूल प्रशासन नेमके काय करत आहे, असा प्रश्न नागरिकांकडून उपस्थित केला जात आहे. वारंवार होणाऱ्या या घटनांमुळे प्रशासनाच्या कार्यक्षमतेवर गंभीर प्रश्नचिन्ह निर्माण झाले आहे.
