मुंबई, विशेष प्रतिनिधी
मुख्यमंत्री माझी लाडकी बहीण योजनेच्या लाभार्थ्यांसाठी एक आनंदाची बातमी आहे. मे महिन्याचा प्रलंबित हप्ता कधी देणार या संदर्भात महिला व बालकल्याण मंत्री आदिती तटकरे यांनी सन्मान निधीच्या वितरणाची माहिती दिली असून तांत्रिक प्रक्रिया पूर्ण होताच आजपासून (५ जून) हा निधी थेट लाभार्थ्यांच्या आधार-लिंक्ड बँक खात्यांमध्ये जमा होण्यास सुरुवात होईल.
मे महिन्याचा हप्ता जून महिना उजाडला तरी जमा न झाल्याने महिला वर्गात काहीशी नाराजी दिसून येत होती. निवडणुकीपूर्वी वेळेवर पैसे जमा करणाऱ्या सरकारकडून निवडणुकीनंतर या योजनेत दिरंगाई होत असल्याची चर्चा होती. मात्र, आता आदिती तटकरे यांनी स्वतः याबाबत स्पष्टीकरण देत महिलांना दिलासा दिला आहे.
तटकरे यांनी आपल्या ट्विटमध्ये म्हटले आहे की, “महायुती सरकारचा दृढ निश्चय, माननीय मुख्यमंत्री देवेंद्रजी फडणवीस साहेब, माननीय उपमुख्यमंत्री एकनाथजी शिंदे साहेब, माननीय उपमुख्यमंत्री अजितदादा पवार यांचे सातत्यपूर्ण मार्गदर्शन व महाराष्ट्रातील लाडक्या बहिणींचा दृढ विश्वास या बळावर मुख्यमंत्री माझी लाडकी बहीण योजनेची दमदार वाटचाल यापुढेही अशीच सुरू राहणार हा मला विश्वास आहे.” यामुळे या योजनेच्या भविष्याबाबतही त्यांनी विश्वास व्यक्त केला आहे.
मुख्यमंत्री माझी लाडकी बहीण योजनेंतर्गत पात्र महिलांना दरमहा १५०० रुपये दिले जातात. यापूर्वी एप्रिल महिन्याच्या हप्त्याची रक्कम ७ मे रोजी वितरित करण्यात आली होती. योजनेच्या सुरुवातीपासून आतापर्यंत पात्र लाभार्थ्यांना ११ हप्त्यांमध्ये एकूण १६,५०० रुपये मिळाले आहेत. काही महिन्यांमध्ये दोन महिन्यांची रक्कम एकत्रितपणेही देण्यात आली होती. या घोषणेमुळे राज्यातील हजारो लाडक्या बहिणींना मोठा दिलासा मिळाला आहे.
https://x.com/iAditiTatkare/status/1930271588353528059?t=8OjGBurVrING9o73F07Omw&s=19
