महाराष्ट्र संवाद न्यूज, ५ जुलै –
नाशिक जिल्ह्यातील मालेगाव तालुक्यात भूखंड अदलाबदलीमध्ये झालेल्या गैरव्यवहाराप्रकरणी उपविभागीय अधिकारी (SDO) उदय किसवे यांना तात्काळ निलंबित करण्यात आले आहे. राज्याचे महसूल मंत्री चंद्रशेखर बावनकुळे यांनी शुक्रवारी (४ जुलै २०२५) विधानसभेत ही घोषणा केली.
मौजे संगमेश्वर आणि गुगळगाव येथील जमिनींच्या अदलाबदलीत नियमांचे उल्लंघन झाल्याचा आरोप किसवे यांच्यावर आहे. त्यांनी संगमेश्वरची जमीन गुगळगावला आणि गुगळगावची जमीन संगमेश्वरला बेकायदेशीरपणे अदलाबदल केल्याचे समोर आले आहे.
याप्रकरणी महसूल मंत्री बावनकुळे यांनी कठोर कारवाईचे संकेत दिले आहेत. किसवे यांच्या निलंबनासोबतच, या गैरव्यवहारात सहभागी असलेल्या आठ मुद्रांक अधिकाऱ्यांच्या विभागीय चौकशीचे आदेश देण्यात आले आहेत. तसेच, स्टॅम्पवेंडर जाकीर आणि आरिफ अब्दुल लतीफ यांच्यावर फौजदारी कारवाई करण्याचे निर्देशही देण्यात आले आहेत.
उदय किसवे यांच्यावरील विभागीय चौकशी एका महिन्याच्या आत पूर्ण करून त्यांच्यावर कठोर कारवाई केली जाईल, असे आश्वासनही महसूल मंत्री बावनकुळे यांनी विधानसभेत दिले.
दरम्यान अहिल्यानगर जिल्ह्यात देखील असे प्रकार मोठ्या प्रमाणात घडल्याची शक्यता वर्तविण्यात येत असून काही प्रकरणे न्यायप्रविष्ट आहेत. त्यामुळे येथील अधिकाऱ्यांवर देखील महसूल मंत्री बावनकुळे यांच्याकडून कोणती कारवाई केली जाते याकडे लक्ष लागले आहे.
