महाराष्ट्र संवाद न्यूज ऑनलाईन वृत्त
नाशिक:
महाराष्ट्राच्या राजकीय आणि प्रशासकीय वर्तुळात सध्या ‘हनी ट्रॅप’ची एक मोठी चर्चा सुरू आहे, यामुळे खळबळ उडाली आहे. नाशिक दौऱ्यावर असलेल्या एका बड्या नेत्याने अनौपचारिक गप्पांदरम्यान एक धक्कादायक गौप्यस्फोट केला आहे. त्यानुसार, राज्यातील तब्बल ७२ वरिष्ठ अधिकारी आणि काही आजी-माजी मंत्री ‘हनी ट्रॅप’मध्ये अडकल्याची शक्यता वर्तवली जात आहे. ही प्रकरणे केवळ हनी ट्रॅपची आहेत की अधिकाऱ्यांच्या ‘रासलीला’ आहेत, याबाबत अद्याप स्पष्टता नाही, मात्र यामुळे नाशिकच्या राजकीय वर्तुळात प्रचंड उत्सुकता निर्माण झाली आहे.
या प्रकरणात नाशिकमधील एका बड्या अधिकाऱ्याचाही समावेश असल्याची चर्चा असून, नाशिकमधील एका पंचतारांकित हॉटेलमध्ये हा प्रकार घडल्याचे बोलले जात आहे. या संदर्भात नाशिकच्या मुंबई नाका पोलिस ठाण्यात एका महिलेने तक्रार दाखल केल्याची माहिती आहे. संबंधित अधिकारी आणि नेत्यांचे आक्षेपार्ह व्हिडिओ असल्यामुळे कोणीही उघडपणे समोर येण्यास तयार नाही, त्यामुळे हे संपूर्ण प्रकरण सध्या गुलदस्त्यात आहे.
या प्रकरणात नाशिकसह मुंबई आणि पुणे येथील बड्या अधिकारी आणि नेत्यांचा सहभाग असल्याची शक्यता वर्तवली जात आहे, ज्यामुळे या प्रकरणाचे गांभीर्य वाढले आहे. बड्या नेत्याने केलेल्या या गौप्यस्फोटामुळे अनेकांच्या भुवया उंचावल्या आहेत. या हनी ट्रॅपमध्ये नेमके कोणते अधिकारी किंवा मंत्री अडकले आहेत, याची उत्सुकता शिगेला पोहोचली आहे. हे प्रकरण केवळ वैयक्तिक संबंधांपुरते मर्यादित आहे की यामागे काही मोठे षड्यंत्र आहे, याचाही शोध घेण्याचा प्रयत्न सुरू आहे.
दैनिक आपलं महानगर आणि टीव्ही नाईन या वृत्तवाहिनीने या संदर्भात दिलेल्या वृत्तानुसार या घटनेमुळे प्रशासकीय आणि राजकीय वर्तुळात मोठी अस्वस्थता पसरली आहे. संबंधित व्हिडिओ बाहेर आल्यास अनेक बड्या व्यक्ती अडचणीत येण्याची शक्यता आहे, त्यामुळे हे प्रकरण दाबण्याचा प्रयत्न होण्याचीही चर्चा आहे. मात्र, या गौप्यस्फोटामुळे नाशिकपासून सुरू झालेली ही चर्चा आता राज्यभर पोहोचण्याची शक्यता आहे. यामुळे आगामी काळात महाराष्ट्राच्या राजकारणात मोठा भूकंप होईल, असे बोलले जात आहे. या प्रकरणाचे सत्य कधी समोर येते, हे पाहणे महत्त्वाचे ठरेल.
