सण-उत्सवांच्या पार्श्वभूमीवर संगमनेर उपविभागात पोलीस प्रशासनाची मोठी कारवाई; गुन्हेगारी पार्श्वभूमीचे सात जण जिल्ह्यातून हद्दपार

Annant Ppangarkar

महाराष्ट्र संवाद न्यूज ऑनलाईन –

आगामी सण-उत्सवांच्या काळात कायदा व सुव्यवस्था अबाधित राखण्यासाठी संगमनेर उपविभागीय पोलीस प्रशासनाने गुन्हेगारी प्रवृत्तींविरोधात कारवाईचे पाऊल उचलले आहे. संगमनेर शहर, तालुका आणि अकोले परिसरातील विविध गंभीर गुन्ह्यांमध्ये सहभागी असलेल्या सात जणांवर अहिल्यानगर जिल्ह्यासह लगतच्या नाशिक आणि पुणे जिल्ह्यातील सिन्नर व जुन्नर तालुक्यांतून ६ महिने ते २ वर्षांच्या कालावधीसाठी हद्दपार (तडीपार) करण्यात आले आहे.

सण-उत्सवांच्या काळात परिसरात दंगा-धोपा, शस्त्रांचा वापर आणि गुन्हेगारी कारवाया करून कायदा-सुव्यवस्थेला बाधा पोहोचवणाऱ्यांवर प्रतिबंधात्मक कारवाई करण्याचे आदेश उपविभागीय पोलीस अधिकारी कुणाल सोनवणे यांनी संबंधित पोलीस ठाण्याच्या प्रमुखांना दिले होते. त्यानुसार संगमनेर उपविभागातील माहिती संकलित करून त्यांच्याविरुद्ध महाराष्ट्र पोलीस अधिनियम कलम ५६(१)(अ)(ब) अन्वये उपविभागीय दंडाधिकारी, संगमनेर यांच्याकडे चौकशीसाठी हद्दपारीचे प्रस्ताव सादर करण्यात आले होते. चौकशीअंती उपविभागीय दंडाधिकाऱ्यांनी सात आरोपींवर हद्दपारीचे अधिकृत आदेश पारित केले आहेत.

हद्दपार करण्यात आलेल्यामध्ये देवाचा मळा (संगमनेर) येथील निलेश राजेंद्र काळे, चत्तर हॉस्पिटल जवळील सिद्धार्थ उर्फ सिद्धांत दीपक माळवे, मिर्झापूर येथील महेंद्र बाळासाहेब निळे, जमजम कॉलनीतील अजमत लतीफ कुरेशी आणि हिवरगाव पावसा येथील सुयोग अशोक दवंगे या पाच जणांना प्रत्येकी एक वर्षाच्या कालावधीसाठी हद्दपार करण्यात आले आहे. कोळवाडे (ता. संगमनेर) येथील आरोपी संपत उर्फ प्रशांत शांताराम गागरे याच्यावर सर्वाधिक दोन वर्षांची तडीपारीची कारवाई करण्यात आली आहे, तर ब्राह्मणवाडा (ता. अकोले) येथील निलेश रामदास आरोटे याला सहा महिन्यांसाठी हद्दपार करण्यात आले आहे.

या सर्व आरोपींना अहिल्यानगर संपूर्ण जिल्ह्यासह पुणे जिल्ह्यातील जुन्नर तालुका आणि नाशिक जिल्ह्यातील सिन्नर तालुक्याच्या हद्दीत प्रवेश करण्यास पूर्णपणे मनाई करण्यात आली आहे.

पोलीस प्रशासनाने दिलेल्या माहितीनुसार गुन्हेगारी पार्श्वभूमी असणाऱ्या घटकांवर तडीपारीची ही मोहीम पुढेही सुरूच राहणार आहे. संगमनेर शहर पोलीस ठाण्यांतर्गत ऑन-रेकॉर्ड असलेल्या इतर २५ गुन्हेगारांचेही तडीपारीचे नवीन प्रस्ताव सादर करण्याचे निर्देश देण्यात आले आहेत.

ही धडक कारवाई जिल्हा पोलीस अधीक्षक मुम्मक्का सुदर्शन, अपर पोलीस अधीक्षक सोमनाथ वाघचौरे आणि उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली संगमनेर शहर, संगमनेर तालुका आणि अकोले पोलीस ठाण्याच्या संयुक्त पथकाने पार पाडली आहे.